– Bevar fridom, demokrati og mangfald
Fleire hadde tatt turen til minneparken då Os kommune markerte Veterandagen i dag.
Bildeserie:
Etter fleire dagar med høljande regn stilte vêrgudane med vakkert solskin på Frigjerings- og Veterandagen 8. mai.
I minneparken blei dagen tradisjonelt markert med talar, musikk og kranspålegging.
– Minneparken er eit viktig lokalt symbol for dei falne soldatane under krigen, talte konfransiér for dagen, varaordførar Marie E. Lunde Bruarøy.
Henrettingar på Ulven
Hovudtalar i Minneparken var dette året brann- og redningsjef Stein Gjøsund.
– Vi fikk historia frå 2. verdenskrig tett på her i kommunen.
Gjøsund fortalte om Ulven fangeleir og grusomme handlingar som skjedde der i åra 1940-45.
– Eit eksempel er då den norske MTB-besetninga blei henretta der.
– Det kom tyske marinesoldatar i fly og landa på Vaksinen og gjennomførte grusomme handlingar utan lov og dom.
– Det må ha vore dramatisk å høyra flya koma inn, for dei som var i fangeleiren.
Nye heltar
Vidare gjekk Gjøsund sine tankar over på veteranane, som i etterkrigstida og fram til i dag har tenestegjort for det norske forsvaret.
– Utanlandsteneste i mange konflikt- og krigsområde har gjeve oss nye heltar, men òg nye oppgåver og utfordringar.
Gjøsund utdjupa kor viktig det er å ivareta helsa på best mogleg måte i etterkant av operasjonane.
Eit eksempel på ein av desse nye heltane Gjøsund snakka om var Kåre Emil Brændeland, som for 20 år sidan var troppsjef i Bosnia.
– I ein alder av rundt 20 år leia Brændeland ein operasjon der cirka 30 norske soldatar som, med fare for eigne liv, redda 285 pasientar som skulle evakuerast frå eit sjukehus i Gorazde.
– Medan ambulansen blei direkte beskutt og artillerigranatar slo ned rundt dei, blei pasientane køyrd 1 kilometer til ein fotballbane der 6 NATO-helikoptre henta dei.
Gjøsund fortalde vidare at Brændeland i dag vil bli heidra for innsatsa når kongen tildeler han Krigskorset med sverd.
Viktig å fortelja vidare
Etter å ha takka veteranane for innsatsen dei har gjort ville Gjøsund trekkja fram ei gruppe som sjeldan blir omtalt.
– Det er mødrene som var heime med born og eldre.
– På ei tid utan epost, telefonar, Facebook og Twitter, og med aviser som ofte var sensurert, heldt dei hjula i gang heime.
– No når heltane frå krigen svinner hen, så er det viktig å fortelja historien vidare til den oppvaksande generasjonen.
Til slutt kom Gjøsund med ei oppfordring til dei frammøtte.
– Bevar fridom, demokrati og mangfald for all framtid!