Bil tatt av ras i Samnanger

Det har gått eit stort ras ved Skar i Liavegen i Samnanger onsdag formiddag.

Politi, redningshundar, ambulanse, og brannvesen rykte ut, også redningsdykkarar frå Os reiste til staden.

– Ein bil er tatt av raset, men denne sto parkert. Vi er i kontakt med eigar, som stadfestar at det ikkje var folk i bilen då den blei tatt av raset, opplyser politiet.

Søk i rasområde og sjø

Grunna storleiken på raset, og at det går ut i sjø, blir rasområdet gjennomsøkt.

– Det er førebels ikkje noko som tyder på at nokon er tatt av raset. Ingen personar er sakna og ingen bygningar er tatt av raset.

Vegen forbi staden er stengt på ubestemt tid.

Dei store mengdene med nedbør i natt har òg prega Os. Eidsvegen er kollapsa og stengt, og brannvesenet har i natt vore ute på lekkasjar og vassinntrenging i fire bustadar.