Biljardklubb i støtet

Os Biljardklubb blei stifta i 1984, av Hans Olav Sundøy, som dreiv Os Biljard og Sportsbar i 28 år, til han selte salongen hausten 2012.

Klubben har blant anna fostra fleire noregsmeistrar på junior- og veteran-nivå, men er no frampå for å auka rekrutteringa.

– Vi har 15-20 aktive medlemmar som samlast om måndagane, men har ambisjon om å utvida, gjerne med eigne temakveldar, kursing og nybyrjarkurs, seier Jan Helge Kordts.

– Biljard er eit spennande spel, og samstundes god avkopling og sosialt å halda på med, synest han.

Er du betre enn kjærasten din?

Laurdag har klubben ope hus på Os Biljard og Sportsbar i Os Næringspark, der du kan spela gratis, få informasjon om klubben - og læra deg eit triks eller to.

– Det er alltid kjekt å vinna i biljard. Det skal ikkje mykje tips og trening til før du får framgang nok til å slå folk du tidlegare spelte jamt med.

– Anten du er interessert i bli medlem i klubben, eller berre vil innom for ein prat eller litt instruksjon, så er du velkomen, understrekar han.

Høgt og lågt nivå

Om klubben ikkje er så stor er fleire av medlemmane aktive på høgt nivå.

Kordts, som har sølv frå veteran-NM som beste prestasjon, speler noregscup i eliteklassen. To andre frå Os speler noregscup i 1. divisjon.

– På laurdag vil vi laga lag og ha konkurranse der to og to, ein ny og ein med erfaring, speler mot kvarande, fortel biljard-formannen.