– Bli med opp!
Laurdag inviterer Motbakkeklubben Opptur til oppstartsfest på Liafjellet. - Dei som kjem får t-skjorte og eit halvt år gratis medlemsskap, reklamerar motbakkeløparane.
Tidligare i haust starta ein gjeng løpeglade osingar motbakkeklubben Opptur. Fram til no har dei vore 8-10 løparar på kvar fellestrening.
- Vi har plass til mange fleire og inviterer til "offisiell" opning av klubben ved varden på Liafjellet mellom klokka eitt og to laurdag, fortel Klas Færøvik.
- Sjølv om vi er nokre som liker å ta oss tøffe treningsturar, er klubben for alle.
- Alle som har løpt litt klarer fint å delta på turane vi har som fellestreningar, ein treng ikkje vera supertrent, forsikrar Færøvik.
To turar i veka
Sjølv med det dårlege haustvêret har gjengen klart å halda på to treningar per veke.
- Torsdagar hadde vi eigentleg tenkt intervalltreningar, men dei har vi justert til rolegare langkøyringar.
- Eg trur ein del av dei som har sagt dei vil vera med blei litt skremt av at vi skulle køyre intervall, smiler motbakkeløparen.
- Sundagane er fast langkøyringsdag. Vi prøver å finna nye rundar kvar gong.
Ein times løpetur
Sist sundag utforska dei Høglikampen og området rundt. Komande sundag er det Lyshorn som er målet.
- Fellestreninga startar klokka 12 ved Lyseklosterruinane på sundag.
- Dei av oss som vi ha litt meir trening tek gjerne ein time i forkant og ein time i etterkant i tillegg.
- Det gjer at vi skal klara å skapa eit tilbod til alle, både dei som vil løpa langt og dei som ikkje har tid eller ambisjonar til dei lengre turane, forklarer Færøvik som håper mange finn vegen opp på Liafjellet laurdag og blir med på Lyshornet sundag.