– Blir aldri likt
Laurdag opnar Livio Wiggo Lilli keramikkutstilling i GalleriOz. - Teknikken eg nyttar gjer at resultata aldri blir dei same.
Lilli nyttar ein spesiell teknikk når han skapar kunstverka han har med seg til GalleriOz.
- Eg arbeider med ein sandstøpingsteknikk som er tidkrevjande, men utruleg spennande, forklarar kunstnaren entusiastisk.
For å skape dei forskjellege formane tek han (veldig forenkla forklart, journ.mrk) ei kasse med sand kor han grev ut den ytre forma på skåla eller kunstverket han skal laga. Deretter dekorerar han den med å laga mønster i sanda før den flytande leiremassa blir helt opp i det utgravde holet. Etter eitt døgn sugast den overskytande leira oppatt og ein tidkrevande prosess med tørking over ein måned tek til.
- Det er den kritiske fasa i prosessen. Eg må heile tida passe på at ikkje øvste delen tørkar fortere enn den nedste. Risikoen er at verket sprekk.
Unike former
Lilli forklarar han har brukt lang tid på å utvekla teknikken, slik at han no har rimeleg god kontroll på at kunstverka ikkje sprekk i tørkeprosessen.
- Ein annan ting med denne teknikken er at du står mykje friare i høve til former, enn du til dømes gjer ved tradisjonell støping med gipsformer.
- Det er eigentleg berre fantasien og kor go du er på å grava i sanda som set grenser, smiler Lilli.
Hentar sand i naturen
Kunstnaren, som òg driv med meir tradisjonell keramikkarbeid, fortel at han treng ei spesiell type sand når han skal støpe.
- Ho må vera akkurat passe fin og smelta ved den riktige temperaturen.
- Krisa er når eg byrjer å gå tom for sand og må ut for å finna ny. Eg har nokre plassar kor eg hentar sand, til dømes i Glomma, men av og til opplever eg at ho har forandra seg og dermed ikkje kan brukast.
Første reine sandutstillinga
Utstillinga i GalleriOz er den første utstillinga Lilli har kor det berre er sandstøpte former han stillar ut.
- Det har vore utruleg spennande å jobba med berre sandstøping det siste året for å få til denne utstillinga.
- Gjennom det siste året har eg fått moglegheiten til å finslepa teknikken og teste ut nye måtar å gjera det på, avsluttar kunstnaren med verkstad i Norsk Stålpress sine gamle lokale i Sandviken.