Blir årets talar på frigjerings- og veterandagen

Fredag 8. mai er det tid for markering av frigjerings- og veterandagen.

Tradisjon tru blir det seremoni i Os Minnepark. Også i år blir det samling og talar i Kløvertun etterpå.

Markeringa i minneparken startar med flaggborg av elevar frå 9. trinn ved Os ungdomsskule.

Ordførar Terje Søviknes skal stå for opninga.

Aksel Henning Holdhus, akkompagnert av Jon Søfteland Sæbø, er forsangar på «Fedrelandssalmen», så skal Nils Sveinsson Holmefjord synga
«Til Ungdommen».

Årets talar er Insaaf Ali Ismail.

Ho jobbar for FN-sambandet, ein norsk organisasjon som jobbar med å informera om FN, i hovudsak retta mot elevar.

I fjor var det kollegaen hennar på kontoret i Bergen, Kai Grieg, som heldt tale.

Etter talen er det nedlegging av blomar og kransar på bauta, minnesmerke og frivilligmonument. Os KFUK-KFUM-speidarar legg ned kransar på kyrkjegarden.

3. trinn ved Os barneskule syng «Nordmannen» og «Vi-sangen».

Programmet held fram med ei samling i Kløvertun som er open for alle, organisert av kommunen i samarbeid med veteranorganisasjonen NVIO Bjørnafjorden.

Der blir det enkel servering og orientering om restaureringa av veteranbåten MB Snøgg.

Guri Dypvik og Edvard Mjanger skal stå for musikalsk innslag med utdrag av «Fagert er landet».