Fire av dei fem frå Os som deltar i Team Rynkeby Bergen neste år. (Foto: Kjetil Vasby Bruarøy)
Fire av dei fem frå Os som deltar i Team Rynkeby Bergen neste år. (Foto: Kjetil Vasby Bruarøy)

Blir del av Team Rynkeby i 2020

Fleire osingar skal sykla til Paris for å samla inn pengar til born med kreft.

Kjetil Vasby Bruarøy
14. desember 2019 - 23:20

Team Rynkeby: Det starta med ein dansk gjeng med mosjonssyklistar, med tilknyting til juicebedrifta Rynkeby Foods, som i 2002 sykla til Paris for å sjå innspurten på Tour de France. Gruppa fekk sponsorar og kronene som blei til overs blei donerte til barnekreftavdelinga ved Universitetssykehuset i Odense. I dag går sponsorinntektene uavkorta til kampen mot barnekreft, syklistane betaler utstyr og reise sjølv. Rynkeby har nemleg vakse til å bli ein stor, nordisk veldedig organisasjon som i år samla inn over 106 millionar kroner.

Søndag blir nokre komande langdistansesyklistar å sjå på Moldegaard sin julekos med kakao, gløgg og nissebesøk i stallen. Dei er der for å visa seg før dei skal på sponsorjakt og i trening til ein sykkeltur på 1.300 kilometer.

– Eg er vant med hest, men eg er ikkje vant med å sykla. No må eg i hardtrening, seier Hilde Johannessen.

Ho jobbar deltid med gruppetrening innan styrke og løping på Actic, men alle som skal delta i Team Rynkeby må ha 2500 kilometer trening på sykkel for å stilla til start. På dagtid jobbar ho på seksjon smertebehandling og paliasjon på Haukeland. Der tar ho blant anna imot kreftsjuke born, og der har ho kollegaer som har deltatt i Team Rynkeby før.

Ho søkte og fekk plass, det same gjorde Rune Walle. I tillegg er to andre frå Os med på laget frå Bergen; Torbjørn Magnussen og Tone Linn Knutsson.

– Det var veldig kjekt å sjå at fleire frå Os skulle vera med, seier Tone Linn, som deltok både i 2017 og 2018.

Frå fusk til frivillig innsats

Rune Walle driv helst løpe- og skitrening med Opptur Motbakkeklubb, men er interessert i sykling, har vore og sett Tour de France og har eit kreativt forsøk på Bergen-Voss bak seg.

– Sykkelen min blei øydelagt etter hundre meter. Då ein kamerat kom med ny sykkel, fekk eg han til å køyra forbi dei eg skulle sykla med. Så gøymde eg meg bak kafeen på Gullbotn og hekta meg på då dei kom pustande etter bakken opp frå Trengereid, fortel Rune og ler.

– Det var viktigare å sykla i godt selskap enn å kryssa av for å ha gjennomført. Eg kan ikkje seia at eg har sykla Bergen-Voss, men eg har sykla Gullbotn-Voss.

Så blir han meir alvorleg.

– Då Hilde spurde om eg ville vera med, så takka eg ja på strak arm. Men då eg las meg opp på saka, kor lite pengar som går til forsking på kreft hos born i forhold til dei meir kjente kreftformene hos vaksne, blei eg ekstra glad for at eg hadde søkt og for at eg fekk plass.

Vil få spesialservering

Team Rynkeby - God Morgon består av 2100 syklistar og 500 hjelperarar fordelt
 på 54 lag i Norge, Danmark, Sverige, Finland, Færøyene, Island og Tyskland.

Viss du trudde Havnechefen-kokken Frank Vasby Bruarøy, som er med på bildet, skulle sykla til Paris, så har du nesten rett.

– Vi spurde om sponsing, og han lovde vekk seg sjølv. Dermed har vi kokk med oss i ein av følgjebilane, og han har fått ei utfordring, fortel Rune.

– Eg har høyrd at syklistar kan legga på seg mykje på lange ritt, fordi dei stappar i seg så mykje sukker. Under rittet er det jo krise å gå tom for næring, men eg har fått Frank til å lova at han saman med Siw Raw skal sy saman noko næringsrikt og godt, utan at vi blir altfor lubben av turen.

I sykkelspora til Tour de France

Tone Linn seier at dei kan gle seg til å sykla 10-20 mil for dagen i 8 dagar, gjennom fint kontinentalt landskap og innom mange sjarmerande landsbyar.

– Eg likte meg spesielt godt gjennom Belgia, der er det litt kupert i forhold til resten av ruta, fortel ho.

Rune ser mest fram til ein bestemt del av Belgia.

– Eg gler meg til å sykla opp Mur de Huy, seier Walle om den kjente, bratt Tour de France-etappen.

Team Rynkeby sine mange lag syklar før Tour de France startar. Fram til sommaren blir det både trening og sponsorjakt til turen.

Les meir om

Sport Sykling