Blir det høgare enn dette?
Mykje regn og høg flo har fått vatnet til å stå høgt i elveosen i Os hamn. Blir det verre?
Måndag var det høg flo i Os, måndag kveld og natt til tysdag var det både tungt regn og mykje lyn.
– Verken nedbøren eller lynet har skapt trøbbel i Os i natt, etter det vi kjenner til, seier varabrannsjef Arne Monsen.
Men kan høg flo saman med høg elv få Oselvo til å gå over kanten dei neste dagane?
Ifølgje NVE (Norges vassdrags- og energidirektorat) er det stor vassføring i elvene på Vestlandet, men den skal minka frå onsdag.
Ifølgje Meteorologisk institutt er det 191 cm høgt vatn på full flo i 13-tida i dag og 188 cm i 1-tida natt til onsdag.
Det er først på rundt 210 cm høg flo at det byrjar å bli spennande i Os hamn, men det er kanskje likevel lurt å sjå til båten sin i desse dagar.