Blir historisk

Hjelmar, skulderputer og cheerleaders på Kuventræ, i dag blir det for første gong spelt seriekamp i amerikansk fotball i Os.

Kjetil Vasby Bruarøylørdag 15. mai 2010 07:34

Jervane, Os Wolverines, klarte det dei hadde håpa på då laget blei etablert på seinsommaren i fjor; få ei stor og god nok stamme til å spela serie i 2010.

I dag er ein stor dag for spelarane og laget, som er ein del av Os Turnforening, klokka 15 startar den første seriekampen i amerikansk fotball som nokosinne er spelt i Os kommune.

Ordførar Terje Søviknes kjem for å ta kickoff. Nesten like spennande blir det kanskje med cheerleaders-innslag i pausen, for ikkje å snakka om opplevinga av å sjå amerikansk fotball live i heimbygda.

Laget frå Os debuterte med bortekamp mot Gladiators i Kristiansand. Kampen enda med tap 25-6, etter bra forsvarsspel, men ikkje godkjent offensiv.

I dag får vi sjå om trenar Christian Detjen har fått justert godt nok til at Os Wolverines kan slå gjestane, Hamar Ruins, som også tapte i serieopninga.

Det blir open kiosk og speaker som hjelper publikum å forstå gangen i spelet. Djervane tar 20 kroner i inngangspengar.