Blir likevel ikkje sendt til Lysekloster

Byråd for barnehage, skule og idrett i Bergen, Pål Hafstad Thorsen (Ap) presenterte onsdag framlegget til skulebruksplan for Bergen kommune 2016 til 2020.

Då skulebruksplanen blei lagt ut på høyring i november blei det kjend at byrådet gjorde framlegg om å legga ned Nordvik skule, heilt sør i Fana og at ein var i dialog med Os kommune og Lysekloster skule om å overføre elevane dit.

Dette skapte ikkje uventa reaksjoner blant foreldre, som i si høyringsuttale gjorde framlegg om å gjera om skulen til eit oppveksttun med både skule og barnehage under same tak.

Les òg: Skeptiske bergenspolitikarar vitja Lysekloster skule

Dette går Hafstad Thorsen ikkje inn for, men han vil ikkje lenger "tvangs-sende" elevane til Lysekloster.

– Foreldra har i høyringsprosessen vore veldig tydelege på at dei heller ønskte seg til Kirkevoll skule. Vi tykte det var eit godt forslag å inngå eit samarbeid med Os kommune, men med så sterke motforestillinger var ikkje det noko vi ville gå for, seier Hafstad Thorsen til Fanaposten.

Held døra open

Elevane ved Nordvik skule får Kirkevoll skule som si nye nærskule, men byråden held framleis døra open for Lysekloster skule når Nordvik blir lagt ned frå skuleåret 2017/18.

– Elevane får Kirkevoll skole som ny nærskule, mens dei av elevane som ønskjer å gå til Lysekloster kan søkje seg dit, skriv han i saksframlegget som skal behandlast i byrådet 19. mai og i bystyret i Bergen 15. juni.