F.v.: Johanna, Maria og Vilde viser eit av design-utkasta, men understreker at dei framleis er på utviklingsstadiet med appen. (Foto: Kjetil Vasby Bruarøy)
F.v.: Johanna, Maria og Vilde viser eit av design-utkasta, men understreker at dei framleis er på utviklingsstadiet med appen. (Foto: Kjetil Vasby Bruarøy)

Blodig Alvor: Elevar startar «mensen-app»

– Den skal bli meir komplett enn appane som er i marknaden i dag, seier Johanna, Maria og Vilde.

Kjetil Vasby Bruarøy
13. desember 2019 - 13:49

2. klassingar ved Os Gymnas og Os vidaregåande skule er i gang med å etablera ungdomsbedrifter (UB).

Tidlegare i haust har dei presentert seg på samling på Peppes og i gründerparken, der dei blant anna har fått tilbakemeldingar og råd frå næringssjef i Os kommune, Elin Bryn Thorsen. Nyleg har ungdomsbedrfitene ved Os vgs hatt julemesse, men det store målet er fylkesmessa til våren.

– Hos oss har vi blanda dei to sal, service og tryggleik-klassane og delt dei opp i fire grupper, fortel ein av lærarane ved Os vgs, Silje Eiken.

11+12 elevar har blitt fire bedrifter. Desse jobbar med kvar sine idear og produkt, frå å laga energibar, designa trykk til klede og import av krystallglas.

Den fjerde bedrifta får ein hektisk, teknologisk innpsurt mot fylkesmessa. Blodig Alvor UB er i ferd med å forma ein app som skal hjelpa jenter og kvinner i samband med menstruasjonssyklusen.

– Dagens utval er enkelt

Vi møtte tre av dei fem jentene i verksemda Blodig Alvor UB, Johanna Bugge Gjerdevik Kolstad, Maria Solberg og Vilde Madelen Moberg Andersen.

– Vi hadde fleire idear i innleiande fase, og valte ein teknologisk krevjande, men noko unik idé å jobba vidare med, fortel dei tre unge gründerane.

– Det er fleire appar om menstruasjon frå før, men dei fleste av desse har berre éin funksjon, for eksempel ein kalender. Fleire medelevar vi lufta ideen for, nemnte at dei bruker ein av desse, blant anna for å få eit varsel når neste periode nærmar seg, så du hugsar på å kjøpa bind eller tampongar.

Spørsmål og svar om mat og trening

Blodig Alvor UB vil laga ein meir komplett app, retta mot jenter og damer frå rundt 12 år og opp i alder.

– I tillegg til kalenderfunksjon vil vi at brukarane både skal kunna finna gode råd og få svar på spørsmål dei måtte ha. Vi vil bruka faglege råd frå helsepersonell, og jobbar med å knyta til oss kompetanse på det å svara på spørsmål som kjem inn.

Spørsmåla kan handla om kosthaldsvegleiing og treningstips i samband med menstruasjon.

– Det kan òg koma ein sosial funksjon med chattetråd der brukarane gir kvarandre tips og råd.

Brukarbetaling og annonsering

Inntektskjelda til ungdomsbedrifta skal koma frå både brukarbetaling og annonsering.

– Appen skal vera gratis å bruka i ein startperiode, så folk får testa om dei liker den, men så vil den kosta pengar.

– I tillegg ser vi for oss at den vil bli eit godt annonseorgan for til dømes apotek, produsentar av bind og andre hygieneartiklar.

Ein elev frå ei anna ungdomsbedrift er engasjert til design og teknisk utvikling av appen, mens Blodig Alvor UB formar funksjon og er i dialog med potensielle annonsørar.

– No får vi ein hektisk vinter med å få appen klar til bruk til våren, seier dei unge teknologigründerane.

Les meir om

Næringsliv