Blomsterbutikken flyttar til større lokale

I helga blei det tydeleg at Asiatisk Mat Osøyro legg ned butikken sin på gateplan i rådhuset.

Før helga teikna Os Blomsterservice leigekontrakt på same lokale.

– Vi trivst godt på torget, men vi treng større plass, seier innehavar Marianne Holmefjord.

Butikken aukar frå rett over 70 kvadratmeter til 154 i storleik etter flytting.

10 år på same stad

Dette blir tredje gong butikken flyttar. Det heile starta med mor og dotter i Handlegården, i det som var ein tunell frå Brugata til Oselvo, under der Nav har kontor i dag.

– Der var vi lengst, men brått skulle det lagast parkeringshus i etasjen, fortel Marianne.

Det blei flytting til Buggegården, der det seinare blei Engeline Kafé, men kjøp av butikken som dreiv på torget førte til flytting.

Flyttar før jul

Holmefjord overtar lokalet 1. oktober. Ho har leigekontrakt ut november der ho er i dag.

– Vi har ikkje sett opningsdato enno, men det blir ein gong i dette tidsrommet.

– Vi trivst godt mellom planter og fontener på torget. Hadde lokalet vore større, og litt meir moderne, så hadde eg ikkje sett etter nytt lokale.