Bok nummer to frå Pål-Erik Winther

Winther vaks opp i Åsane, men har budd i Lysefjorden i dei siste fem-seks åra.

I 2016 debuterte han med boka «Storbynetter». I desse dagar kjem «Sebastian & Isabelle - Den tredje portal» i hyllene.

«Storbynetter» kom ut på forlaget Umbrella forlag, eit forlag Winther sjølv var med å starta. No er Winther ein antatt forfattar på Liv Forlag, ein del av Forlagshuset i Vestfold.

Framleis glad i første boka

Winther fortel at han framleis er glad i debuten frå 2016, men at dei to bøkene ikkje har noko med kvarandre å gjera.

– Eg er nok i overkant sjølvkritisk til alt eg gjer her i livet, men sjølv om eg no sjølvsagt ser ting med «Storbynetter» som kunne vore betre og annleis, er eg glad i ho. Boka er eit resultat av den tida i livet mitt.

Winther fortel at debuten har hausta det meste av kritikkar, og med det meiner han frå brutal slakt til hyllest.

– Mange har meint mykje om den boka, men eit vassekte terningkast, det har eg til gode å oppleva.

– Ein kvar kunstnar likar jo å få tilbakemeldingar på det ein har laga, og kritikk kan vera bra det, så lenge den inneheld noko konstruktivt òg. Ofte er eg eining med kva lesarane meiner eg kunne ha gjort annleis.

Winther fortel at han nok i all hovudsak skriv for eit ungt publikum, då gjerne i tenåra, men at test-lesarar godt opp i åra òg har respondert godt på det han skriv.

Var Asbjørnsen og Moe fantasy?

På spørsmål om bok nummer to framleis held seg i fantasy-sjangeren, svarar Winther med eit spørsmål;

– Var Asbørnsen og Moe eigentleg fantasy - dei skreiv jo eventyr dei òg?!

– Eg er ikkje så sikker på om eg er i fantasy-sjangeren, og eg er heller ikkje så sikker på kvar grensene til fantasy-sjangeren eigentleg går. Ikkje har eg drakar med i bøkene mine, men eg skriv om vanlege menneske som som opplever uvanlege ting.

– Det som er litt spesielt med den nye boka er at handlinga startar i 1987, og då den særs populære TV-serien «Stranger Things» kom med sine tydelege 80-talsreferansar, hadde eg allreie mykje av handlinga mi klar. Lita verd? ikkje veit eg …

Etter ein god runde med digresjonar om musikk òg eigentleg kan setjast i sjanger, landar Winther på at han skriv om tid og rom, og at den nye boka er vel så mykje ei sciencefictionbok.

Fiktiv med lokale kjennemerke

«Sebastian & Isabelle - Den tredje portal» handlar om Sebastian, som skal tilbringa sommarferien på besteforeldra sin gard. Ferien byrjar bra med sol, bading og ei gryande forelsking i Isabelle, som bur på øya.

Samstundes ligg det ein skugge over det vesle samfunnet; for elleve år sidan forsvann eit tvillingpar frå øya. Via ei mystisk hole i skogen tek historia ei vending fleire lysår unna.

– I den første boka di sa du at byen i handlinga var ein miks mellom New York og Gotham City i Batman sitt univers, kor er du denne gongen?

– Dette har eg ikkje fortald til mange, men det er faktisk Byrknesøy i Gulen som er «øya» i boka.

Winther fortel at begge bøkene inneheld kjende stadar, men då med nye namn.

– Både Garage og Hulen i Bergen har sine roller, og les du ekstra nøye vil du nok kunne finna andre referansar både innan geografi og kultur. Eg er ikkje der som til dømes Gunnar Staalesen er på å plassera karakterane i kjende settingar, men eg let meg inspirera av kva eg ser og opplever rundt meg.

24.000 ord på ei helg

Til dagen jobbar Winther som IT-konsulent, ein jobb han seier han har jobba hardt for, og som han trivst godt i.

Å bli heiltidsforfattar er samstundes ikkje noko han ville takka nei til.

– Eg håpar sjølvsagt at denne boka, på eit større forlag og med meir støtte i ryggen, kan vera ein døropnar for meg, men samstundes trivst eg godt med den arbeidsfordelinga eg har no.

Den første boka hadde eit opplag på 2.000 eksemplar. At Kulturrrådet tykte om boka gjorde sitt til at dei fleste av bøkene fekk nye eigarar.

– Det hjelpte godt på salet at boka vart antatt av Kulturrådet, og dei kjøpte inn 1.500 eksemplar til skular og bibliotek. Dette er ei fin ordning for oss nye, og til dels ukjende forfattar, og no er eg spent på kva dei tykkjer om den nye boka som dei nyleg fekk til antaking.

– Korleis skriv du - er det farvel til samfunnet i ein periode, og så kjem du tilbake med ei ferdig bok?

– Nei, eg kan gjerne gå fleire månadar utan å skriva noko, men så har eg ein draum ei natt - det byrjar ofte med noko eg har drøymt. Brått har eg skrive 24.000 ord på ei helg.

Lansering på Møllaren

Når du les denne artikkelen er Winther anten på veg til eller på plass på ei stor IT-messe i USA.

Når han er tilbake skal boka offisielt sleppast på Møllaren kafé i Bergen 15. november.

Ein oppfølgjar, eller bok nummer to etter «Sebastian & Isabelle - Den tredje portal», er allereie i emning, kan Winther røpa.

– Eg er jaggu ikkje sikker på om eg eigentleg har byrja på ein serie eller ein triologi, for alt eg veit kan det enda med ein duologi. Men ei bok til i samanheng med denne, det har eg i fingrane allreie.