Bokkveld i Solbakkestova
– Som tidlegare år har vi også i år fått med oss spennande og flotte forfattarar.
Då gler vi oss igjen til bokkveld i Solbakkestova på torsdag kveld. Det er blitt årvisst, at når november kjem, då kjem også bokkvelden, men i år som del av programmet i WT Litteraturfestival.
Som tidlegare år har vi også i år fått med oss spennande og flotte forfattarar.
Denne torsdagskvelden er det den drivne krimforfattaren Jørgen Jæger, som også er nominert til bokhandlarprisen, vår eiga Monica Nordland Yndestad, som har fått strålande kritikkar for si første krimbok, og allsidige Hans Sande, som saman med Bente Bratlund står for orda.
Og så vil vi sjølvsagt få presentert årets Osingen.
Våre faste bokkveldmusikarar ”Tre med skjegg og ein utan” er også høgdepunkt vi gler oss til.
Det blir dekka bokbord så ein kan sjå og også kjøpa, og det blir kaffi og kaker.
Nokre heldige vil til og med kunna vinna seg ei bok på inngangsbilletten, som er gratis.
Vi ønskjer alle gamle og nye bokkveldgjestar velkommen.
Vidar Bratlund Mæland