Sport | 20. mars 2016

Boksetalentet Mathias vann Askim Open

Os har fått eit nytt kampsport-talent, denne gong i boksing. Mathias Noel vann ein knusande finale i Askim.

Boksetalentet Mathias vann Askim Open
Mathias Noel trente på sekk på altanen heime på Sveo laurdag. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøysøndag 20. mars 2016 16:48

Mathias Noel, som fyller 16 år i år, er i ferd med å slå seg opp som boksar. Knappe to år etter at han byrja med sporten vann han førre helg sitt første stemne.

– Eg har hatt lyst til å byrja med boksing sidan eg var 8-9 år gamal, men pappa heldt igjen til eg va på tampen av 8. klasse, han var redd for at eg skulle bli lei om eg byrja for tidleg.

Pappa Simon Noel flytta til Os for ti år sidan. Mathias går framleis på skule i Loddefjord og blir trent av Hjalmar og Anders Styve i 108 år gamle Bergens Atletklubb.

– Det er mange klubbar å velja mellom i Bergen. Pappa har fleire kameratar som har trent kampsport og har sjølv vore ein kort periode i B.A.K., så då blei det Styve på meg òg, seier Mathias, nøgd med valet.

Debuterte i NM

Mathias gjekk sin første kamp då han deltok i NM i november 2015.

– Eg møtte favoritten i første kamp. Han vann suverent, men eg var nøgd med mi eiga boksing etterpå, det var ein grei kamp av meg.

Neste kamp blei i rekruttserien i februar. Serien har seks stemne frå haust til vår, dei fleste på Austlandet, og Mathias vann 3-0 i sin første kamp i serien.

La om stilen i Askim

Førre helg var det tid for Askim Box Cup. Mathias hadde sett video av kampen sin i Oslo i februar, og såg noko han ville justera på.

– Eg slo for lite og bestemte meg for å køyra meir på i Askim.

For pappa Simon såg det ut som om sonen fullstendig hadde lagt om stilen, med suksess!

– Han gjekk frå å vera ein teknisk avstandsboksar til å ta ei langt meir offensiv rolle. Han sette motstandaren ut av spel allereie i første runde, fortel Simon.

Motstandar var Elias Langeland fra Aurland Bokseklubb. Dommarane talte 29-16 i reine treff på tre rundar og Mathias vann finalen i -70 kg suverent 3-0.

Set seg landslaget som mål

På spørsmål om kven han har som forbilde seier Mathias at han ser mykje cubansk boksing.

– Dei er teknisk gode og tar imot lite juling, i motsetnad til mexicanarar. Som forbilde vil eg seia trenarane mine, både Ander Styve og senior Hjalmar, som i ein alder av rundt 70 år framleis driv talentutvikling omtrent kvar einaste dag.

Mathias er både høg og tung til alderen og har ikkje så mange motstandarar i -70 kg klassen, den nest tyngste rekruttklassen.

– Det varierer nok frå stemne til stemne kor mange som reiser for å delta. Blir det for få så kan det henda at vi reiser til Danmark eller Sverige med tida.

Neste stemne er i rekruttserien i Trondheim i midten av april, så er det stemne i Bergen i slutten av april. I juni, dagen etter at han er ferdig i grunnskulen, skal han på treningssamling ei lita veke på Olympiatoppen i regi av Norges Bokseforbund.

– Det er veldig inspirerande å vera i gang med kampar. Målet er å koma seg inn på landslaget.

– Nokre dagar i veka er eg oppe klokka 5 for å ta ein joggetur før skulen. Då er pappa med. Elles er det trening nesten kvar dag i dei nye lokala til Bergens Atletklubb på Danmarksplass, seier Mathias.

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.