Bråk og bålbrenning
Politiet torsdag: Bråk på Amfisenteret, bål på bussterminalen, avskilting av moped, farleg leik i rundkjøringa og eks-type som sparka i ytterdøra.
Torsdag blei ein moped avskilta på Lepsøy. Eigar hadde ikkje teikna ansvarsforsikring, dermed tok politiet med seg kjenneteiknet.
I 13-tida torsdag hadde politiet ein lite trafikkontroll nær Os sentrum. 10 bilar blei kontrollerte, alle hadde alt i orden.
Brann i bosspann
Klokka 15 kom melding om brann i bosspann på venterommet på Os bussterminal.
– Brannen var sløkt då vi kom fram. Brannvesenet kontrollerte åstaden og sørgja for utlufting, fortel politiførstebetjent Audun Hadler-Olsen.
Bråkete ungdom
I 16.30 blei ein bråkete ungdom bortvist frå Amfisenteret.
Det var vektaren ved senteret som viste ungdomen vekk, og så varsla politiet for å orientera om saka.
I 20.30-tida fekk politiet melding om ungdom som sprang rundt i rundkjøringa i Os sentrum. Dei var då opptatt med ransaking og eit større narkobeslag, og kunne ikkje rykka ut på meldinga.
Eks sparka i døra
Torsdag kveld i 21-tida fekk politiet melding frå ei kvinne som følte seg truga av eks-kjærasten.
– Han hadde blant anna sparka i ytterdøra hennar, fortel Hadler-Olsen.
Mannen hadde fjerna seg raskt. Politiet rykte ut og tok ein prat med kvinna, som skulle ta kontakt igjen om ho ville at dei skulle følgja opp saka.