Brennande tonar

Då Os kommune overtok det nye beredskapshuset med brannstasjon og legevakt 12. desember i fjor blei huset omtalt som det mest moderne bygget med tanke på sambruk.

Sundag 14. april klokka 18 blir det lagt endå eit bruksområde til huset når Lyshornet Brass inviterer til konsert med påfølgande omvisning.

– Då bygget opna spelte leiar av legevakta Siri-Linn Schmidt Fotland, og ideen om å bruka vognhallen i brannstasjonen til konsertar blei fødd, forklarar Karl Ole Midtbø, dirigent for Lyshornet Brass.

– Det blei vel òg nemnt at kanskje Osøren blues- og jazzfestival kunne nytta hallen til intimkonsertar, skyt brannsjef Stein Gjøsund inn.

Kjekt å prøva noko nytt

Brannsjefen gler seg over at det no blir konsert der brannbilane til vanleg står, og inviterer til omvisning på stasjonen etter den om lag halvtimes lange konserten.

– Så lenge det ikkje går utover beredskapen er det ikkje noko problem.

– Vi flyttar berre bilane på utsida av portane, og så lenge publikum parkerer på dei oppmerkte plassene eller ved Kiwi, så skal mannskapa mine komma seg ut om alarmen går, seier brannsjefen.

Spent på armatur og interferens

Dirigenten har full tiltru til at brannsjefen har kontroll. Sjølv er han meir spent på om noko av det fastmonterte utstyret i hallen kjem til å synga med på konserten, som følgje av interferens.

– Då Siri-Linn spelte på opninga var det eit av staga i taket som likte bølgelengda og song med då ho trefte ein spesiell tone.

- Det skal bli spennande å sjå om oppheng og ventilasjonsanlegg legg ein ekstra dimensjon til konserten når vi kjem med fullt brassband her, smiler Karl Ole Midtbø.

Om du ikkje får med deg konserten og omvisinga 14. april, lover brannsjefen ny omvising og open brannstasjon laurdagen etter.