Brukt og nytt på Skorpo

Skorpo Utvikling fekk ein svak start på hyttesalet, men har selt både éi ny og fleire eldre hytter.

Kjetil Vasby Bruarøytorsdag 12. aug. 2010 10:30

I 2005 skifta eigedomen «Sjølyst» på Skorpo eigar. Os kommune samarbeida med staten og Bergen og Omegn Friluftsråd for å sikra delar av eigedommen for ålmenta, medan Skorpo Utvikling AS kjøpte den andre delen av området, der det med tida skal byggast til saman 31 hytter.

- Eigedomen inkluderer også fleire hus og hytter, og det er desse vi har selt mest av no i starten, fortel dagleg leiar Geir Osland.

1 av 3 nye
I fjor la dei ut nybygde hytter for sal. Til no er éi av tre selt.

- Finanskrisa sette ein dempar på salet. Men no er dei fleste eldre husa og hyttene selt, og vi jobbar vidare med infrastruktur på øya, også fram til nye tomtefelt.

Blant det som er selt er ei lita hytte på høgdedraget over det førre eigar, Postens Funksjonærforening, brukte til selskapslokale.

Annekset er også selt, til ein eigar som nesten er ferdig med full restaurering av det som blir seksjonert til tre fritidsbustadar.

Tomtesal i haust?
Osland fortel at dei i neste runde kjem til å selja tomter, ikkje ferdigbygde hytter.

- Eg reknar med at vi kjem til å legga ut dei første tomtene i løpet av hausten.

Kloakkreinseanlegg, offentleg vatn, båtplass og parkering i Forstrønesundet er på plass. I hamna rett nedanfor hyttene skal det byggast marina med brygger, sjøbodar og naust.

Stil og stemning
Turstiar, natursteinsmurar og nokre av bygningane er med på å skapa ei heilt spesiell stemning på Skorpo. Funksjonærforening har gjennom 80 år har brukt eigedommen som ferieheim, men dei mest spennande spora på eigedomen er etter Fridtjof Sundt, som kjøpte «Sjølyst» i 1912.

- Det er kjekt å sjå både friluftsområdet, som har blitt oppgradert dei siste åra, og hyttene det no byrjar å bli liv i, skapa liv på Skorpo igjen. No er nytt og gamalt saman i fin harmoni, og betre skal det bli etterkvart som fleire bygger og bruker Skorpo på fritida, seier Geir osland.