BT-prisen til firma frå Os

BT-prisen er ein konkurranse Bergens Tidende vil heidra annonsøranesom har utmerkt seg i ulike kategoriar. Det er medarbeidarane i BT sin marknadsavdeling som leverer forslaga inn til ein intern jury.

Fredag i førre veke var det prisutdeling, og då var fleire frå Os på scenen.

Vinnar av kategorien «årets kampanje» var MX Sport Bergen Holding AS, med eigarar frå Os og, frå i fjor, hovudkontor og lager i Ådnadalen i Os.

– Vi vann for kampanjen som lokka 30.000 gjestar til den årlege sportmessa Fritt og Vilt i Grieghallen i april, fortel dagleg leiar Jan Frode Skeie.

Han er glad og stolt over at selskapet, med Therese Bergset som «in-house» reklamebyrå, noko assistert av det deleigde byrået med samlokalisering, Picapoint, nådde opp i den harde konkurransen.

Å nå fram i fleire kanalar

«Takk! Det er fortent!» sa Skeie frå scenen då han saman med Therese Bergset og kompanjong Odd Arne Larsen mottok prisen.

– Eg såg at SK Brann var i salen, og fleipa med at ikkje ein gong dei klarer å samla 30.000 på éi helg, sjølv ikkje på 16. mai.

Han seier hovudfokuset i Fritt og Vilt-kampanjen, og elles i marknadsføringa gjennom året, har vore å nå fram i fleire kanalar, på papir, digitalt, med innhaldsmarknadsføring, konkurransa og aktivitetar.

– Det er mange annonseorgan å velja i, og du må velja nøye om det ikkje skal bli unødig dyrt. Messa blei igjen ein suksess, både i besøkstal og omsetnad, og dette med mangfald og resultat var noko juryen hadde fokus på.

Personleg og nyttig om eigedom

Årets innhaldsmarknadsførar blei Privatmegleren Bergen og omegn. Blant representantane på scenen var dagleg leiar hos Privatmegleren Vikøyr & Brandt på Os, Arild Vikøyr.

– Leiarane for kontora i og rundt Bergen har vore med på å forma innhaldet, men eldsjela og mannen med hovudansvaret er vår kollega i Bergen, Christer Vikebø, fortel Arild.

– I innhaldsmarknadsføringa har vi vore opptatt av å gje lesarane både nyttige saker og gode, personlege historiar. Det skal ikkje alltid handla om det som er salsutløysande der og då, eller om å skryta over det vi meiner er flinke til, men om noko som er interessant for folk med eigedom, anten dei skal selja eller kjøpa, eller ikkje.

Dei andre prisvinnarane var:
Årets innovative kunde: Sparebanken Vest
Årets «Velkommen inn»: Gulvspesialisten.no
Årets annonsør: Proaktiv Eiendomsmegling