Bygde venskap

28 niendeklassingar frå dei tre ungdomsskulane i Os har det siste døgnet vore samla til MOT-skolering i Osbadet på Kuventræ.

- No skal dei ut i 7. klassane for å fortelje om mot og førebu dei nye ungdomsskuleelevene på den nye skulekvardagen, fortel MOT-ansvarleg i Os kommune Ellen Merete Lyssand.

Saman med Kjersti Tysse Plätzer, Lill Siren Frantzen og Anne Solberg Andersson har ho kursa elevane i MOT sine verdier og arbeid.

- I dag har dei fått testa seg på manuset dei skal nytta for 7. klassingane, fortel Lyssand.

- Du må òg få med at 10. klassingane Anna Kyte Haugland og Gina Victoria Myhre Gaasand har vore med å hjelpt oss.

Ungdommane har vore samla i Osbadet frå onsdag ettermiddag til langt utpå torsdagen. Kvelden og natta har dei brukt til bading, ballspel i hallen og å sjå på film. Svevnen har dei fått på luftmadrassar i to av møteromma på huset.

- Det er utruleg deilig å vera her kor alt er på ein plass. Ein stor takk til Osbadet og Ruben Olsen som kom og var nattevakt for gutane, seier Lyssand.

Spennande og lærerikt

Då Midtsiden vitja MOT-samlinga torsdag var ungdommane fullt i gang med rollespel om det å vera ein god og dårleg ven. Ei anna oppgåve var å skrive ein positiv ting om dei andre på kvar sin papirtallerken.

- Det har vore eit utruleg bra opplegg, fortel ungdommane.

- Vi har hatt det spennande og utfordrande i høve med å lære korleis vera eit godt førbilete.

Inspirert av ungdommane ba vi dei byggje ei pyramide der alle dei 28 ungdommane var med. Som gode vener måtte dei stole på kvarandre og vise at dei hadde mot til å stole på kvarandre.

- Vi er med, strålte ungdommane før dei gjekk igang med å diskutera korleis dei skulle klare oppgåva. Sjå nokre av forsøka på å byggje pyramide i bileta til høgre.