Bygger mur i Vikjo
Arbeidet med Mobergsvika er godt i gang. No har det også kome miljøteikningar som viser korleis det skal bli i Vikjo.
I mai i fjor gav Os Sjøfront 1,5 millionar kroner til oppussing av Mobergsvika. Pengane blir gjeven frå StorBergen, Os Sjøfront-partnar Profier, og StorBergen sin samarbeidspartnar på Bjånes, LieGruppen.
Planen var å starta arbeidet i februar, i staden blei det i slutten av april.
– Men vi har framleis som mål å få Vikjo ferdig til St Hans, seier Espen Børhaug frå StorBergen Boligbyggelag.
Arbeidet med å bygga mur mellom fjøra og plenen er godt i gang. Samtidig har vi fått miljøteikningar frå arkitekt Smedsvik som viser korleis Vikjo skal ta seg ut når arbeidet er ferdig.
Betre tilkomst
– Det er kanskje ikkje så store endringar vi får til for 1,5 millionar kroner, men hovudmåla med arbeidet er å gjera Vikjo meir tilgjengeleg og å hindra erosjon, altså at den gamle muren skulle siga meir ut enn den allereie hadde gjort.
– No blir fjøra rydda og det kjem ein fin mur med god tilkomst, i tillegg til ein rampe så rullestolbrukarar kan koma seg heilt ut i sjøen.
– Så blir det opp til osingane å kosa seg i Vikjo og eventuelt bygga vidare på dette, seier Børhaug.