Byggjer med Rema

Bildeserie:

1 av 1

For om lag 10 år sidan fekk Frode Søviknes opsjon på næringstomta vis a vis Røde kors-huset i Kolskogen. Først var det truck-stopp og motell som sto i planane, no har det utvikla seg til å bli eit næringsbygg på 13 000 kvadratmeter med handel i dei to første etasjane. Mellom anna med ein Rema 1000 butikk på 1500 kvadratmeter.

Torsdag kunne Frode Søviknes, saman med firemenning og ordførar Terje Søviknes presentere dei nye planane for tomta i Kolskogen.

– Vi har jobba med dette over ei tid no. Eg har fått med meg Rema Eiendomsutvikling Vest AS i eit nytt eigedomsselskap som overtek eigedom. Det blir eit selskap eig av Rema Eiendomsutvikling Vest AS og Frode Søviknes Holding AS, fortel Frode Søviknes.

6500 kvadratmeter handel

Bygget dei ser for seg blir eit fire etasjers bygg med parkeringsplan under. I dei to første etasjane blir det ein Rema 1000-butikk på 1500 kvadratmeter og anna handelsrelatert verksemd på 5000 kvadratmeter.

– Tomta er regulert til sokalla plasskrevande handel. Det kan vera type brune- eller kvitevarer, bilvarer eller anna av typen Biltema eller Jula eller kanskje sport. Det blir ikkje eit tradisjonelt kjøpesenter.

– Kva som skjer i 3. eller 4. etasje er meir uavklart, men det ligg og inne frå då vi jobba med motellplanane at tomta kan nyttast til bevertning og overnatting. Det er nok truleg at det blir ein kafé i 3. høgda i alle fall, forklarar Søviknes.

Solid samarbeidspartner

Eigedomsutviklaren er glad for at han har fått med seg Rema på laget.

– Dei er ein solid samarbeidspartner som sikrar realiseringa av prosjektet i løpet av dei næraste åra. Ein så stor aktør leiker ikkje butikk og har heilt sikkert gjort grundige vurderingar før dei har gått inn i prosjektet, seier Søviknes.

Han får støtte frå ordførar Søviknes.

– Det er ikkje tvil om at dette blir eit attraktivt område for handel når nye E39 til Bergen står ferdig. Dette blir hovudavkøyringa både til Lysefjorden, Strøno, Nore Neset, Hagavik og Øyane, noko eg vil tru gjev eit godt grunnlag for drifta, supplerar Terje Søviknes.

Viktig for bygda

Ordføraren fortel at kommunen ikkje har vore aktivt inne i forhandlingane rundt tomta.

– Vår rolle har vore som den er når andre næringsaktører vil etablera seg. Vi kjem med råd og bidreg på den måten vi kan. Når det er sagt så er denne etableringa heilt i tråd med den fortettingsstrategien vi har for eksisterande næringsområder i Os. På sikt trur og håpar eg dette prosjektet vil generera mange nye arbeidsplassar innan handel og tenesteyting.

– Det treng vi i vekstkommunen Os. Den interkommunale næringsplanen for Os, Fusa og Samnanger som er ute på høyring om dagen anslår at vi fram mot 2030 vil trenge omlag 2000 nye arbeidsplassar i kommunen. Dette prosjektet kan fort enda opp med godt over 100 arbeidsplassar, avsluttar ordføraren.