Byggjer ny seglfly-hangar på 660 kvadratmeter

Bildeserie:

Full skjerm

1 av 6

– Vi har jobba intenst og lenge med dette prosjektet, og no har vi fått løyve frå kommunen til å reisa ein ny hangar på Vaksinen.

Dette fortel formann i Os Aero Klubb, Truls Rasmussen.

Den nye hangaren skal plasserast ved sida av hangaren klubben allereie har.

Sjølv om den nye hangaren vert på vaksne 44 x 15 meter, seier Rasmussen at den ikkje vil vera det største blikkfanget.

– Den nye hangaren vil liggja på line med den eksisterande hangaren, altså bygd godt inn i terrenget.

– Målet til klubben er at dette skal bli eit fint bygg å sjå på, sjølv om det er ein flyhangar vi snakkar om. Etterkvart vil vi nok sjå på å få malt den i ein passande farge.

Stort behov for lagringsplass

Rasmussen fortel at det er meir enn berre seglfly som skal få plass i den nye hallen.

– Den eksisterande hangaren er ikkje stor nok, og vi har både fly og materiell som no står ute året rundt.

Spesielt materiellet som må til for å driva Os Aero Klubb er noko Rasmussen meiner vil ha godt av å få stå tørt.

– Vi har mange hengarar som kostar mykje å vedlikehalda. Vi opplev eit stort forvitringstap grunna vêr og klima, og når vi no får innandørslagringsplass for dette materialet vil vi garantert sjå at at utlegg og kostanadar går ned.

Eit anna døme på utstyr som treng lagringsplass under tak er grasklipparane klubben nyttar for å halda flystripa i drift.

– For Os Aero Klubb vil det vera god økonomi i å få redusert kostnadar på vedlikehald, seier Rasmussen.

Byggjer med frivilligheit

Rasmussen fortel at Os Aero Klubb tek kostnadane med å få reist hangaren sjølv.

– Vi legg opp til mykje frivilligheit under bygginga, men sjølv om vi jobbar litt etter ideen om at «ting tek tid», har vi eit mål om at det meste skal vera klar til jul.

– No ventar vi berre på at Johs Sælen som skal stå for stålkonstruksjonen, skal bli ferdige med eit anna oppdrag, og så er det vår tur.

– Truleg vil hangaren byrja å reisa seg i løpet av nokre veker, avsluttar Rasmussen.