Magnus Sund opna døra på Catten i går kveld. (Foto: Kjetil Vasby Bruarøy)
Magnus Sund opna døra på Catten i går kveld. (Foto: Kjetil Vasby Bruarøy)

Catten opna igjen - med ny sprit og ny bar

Quiz, nattklubb og sportsbar er i gang igjen etter koronakrisa.

Kjetil Vasby Bruarøy
06. juni 2020 - 9:32

Fredag kveld opna bartender Magnus Sund dørene på Catten.

– Vi hadde ope i går òg. Då var det quiz og pubkveld, med ope til klokka 01. Det var mange på quiz og ein del som kom seinare, for ei sosial stund i puben.

I alt var det over 80 personar innom første opningsdag etter at dei stengte dørene 12. mars.

– I kveld og laurdag er det nattklubb med ope til klokka 03, fortel, Magnus.

Éinmetersregelen og skjerpa reinhald gjeld framleis, og innandørs er det gjort fleire tiltak.

– Vi har fått ros for smitteverntiltaka våre, seier Bjarte Andersen. (Foto: KVB)
– Vi har fått ros for smitteverntiltaka våre, seier Bjarte Andersen. (Foto: KVB)

Éinvegskøyring til bardisken

Det første som møter deg når du kjem opp trappa er gratis sprit, til handvask. Resten kan kjøpast i baren.

Piler i golvet fortel kva veg du skal gå, for du har lov å spasera på Catten, men berre til baren eller toalettet. Elles skal du halda deg i din eigen bås.

Piler og pleksiglas sørgjer for smittevern på Catten. (Foto: KVB)
Piler og pleksiglas sørgjer for smittevern på Catten. (Foto: KVB)

Sitjegruppene er skilte av med pleksiglas, for å sleppa å stenga av annakvar sitjegruppe. I alt er det 105 sitjeplassar. Dansing må folk venta nokre veker med.

Alle dei tre avdelingane er opne. I sportsbaren er pianoet fjerna og ny bar bygd for å auka kapasiteten under dei mest spennande fotballkampane.

Ommøblering og ny bar i sportsbaren. (Foto: KVB)
Ommøblering og ny bar i sportsbaren. (Foto: KVB)

Håper fleire går ut om fredagen

– Det er ikkje tema å gi seg, sa innehavar Bjarte Andersen då smitteverntiltaka mot koronaviruset blei sette inn i midten av mars.

Catten Nightclub har halde stengt sidan torsdag 12. mars. Tre månadar seinare er han i gang igjen.

– Vi hadde bra med gjestar på torsdagsquiz, og ein del som kom seinare for å få seg ein pubkveld. Det var kjekt å møta gjestane igjen, seier Bjarte.

Med redusert kapasitet og mange som kan vera svoltne på å vera sosiale, fryktar han å måtta avvisa mykje folk om laurdagskveldane.

– Normalt er det langt fleire folk om laurdagen enn om fredagen. Om det skal halda fram kan vi måtta avvisa 100-200 gjestar om laurdagane. Eg håper redusert kapasitet endrar dette mønsteret, at fleire av gjestane legg opp til ein tur ut på fredagane. 

– Ein sommar fylt med fotball

Sportsbaren er open, men skjermane er foreløpig svarte.

– Abonnementa våre blir aktive igjen frå måndag 15. juni, 16. juni startar Eliteserien og 17. juni er Premier League i gang igjen.

Brann speler borte mot Haugesund 17. juni. Same dag speler blant andre Manchester City heime mot Arsenal.

Fredag er det Tottenham-Manchester United, søndag står Everton-Liverpool for tur.

Frå 16. juni og ut sommaren kan det bli kamp om plassane på sportsbaren. (Foto: KVB)
Frå 16. juni og ut sommaren kan det bli kamp om plassane på sportsbaren. (Foto: KVB)

– No blir det norsk og engelsk fotball gjennom heile sommaren, så vi ventar høg aktivitet i sportsbaren.

Andersen er òg innehavar av Baronessen, som normalt husar ein del livemusikk, og som i koronatida husa Midtsiden sin direktesendte konsertkveld.

– Baronessen har godt med sitjeplassar, men er ein meir kompakt pub. Vi held denne stengt foreløpig, men det treng ikkje bli så lenge til den opnar igjen.