Colanissen tar to stopp i Os

Onsdag kjem Coca Cola-nissen til Meny.

– Det er sikkert 8-10 år sidan sist. Dette gler vi oss til, seier butikksjef Jahn Ingolf Lyssand.

Han vil sperra av ein liten del av parkeringsplassen for trygg ferdsel dei fem timane nissen er der. I tillegg riggar han opp grill utandørs og køyrer kundekveld i butikken.

– Nissen er her frå 13 til 18, i butikken har vi 10-15 leverandørar på plass med demo. I tillegg til at Coca Cola også har stand under tak.

Pitstop på Røykenes

USA-inspirerte Er-An Veikro har hatt Coca Cola-nissen på uoffisielt besøk to år på rad.

– Vi har vore heldige og fått han innom her på veg mellom Åsane og besøk i sør. Men sidan han allereie hadde eit stopp i Os så har vi ikkje ringt han sjølv, fortel Linda Andersen frå Er-An Veikro.

I staden ringte nissen sjølv.

– Han ville innom på medisterkaker som i fjor og 2013, så det blir eit lite besøk her i 19-20-tida tysdag, før han skal til Industrivegen og stilla seg opp til onsdag.