Då «alt anna» blei avlyst tok desse damene grep

Jule-rebus skapte folkevandring.

Rebecca Hoff Vangsnes (t.v.) og Elisabeth Andvik ved sisiste stopp, postkassen til nissen. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytirsdag 08. des. 2020 11:39

Laurdag starta første av to helger med jule-rebus i Øyane.

– I førjulstida plar det vera både juletrefest og luciadag på skulen, i år blir det ikkje sånn at foreldre eller besteforeldre kan samlast i gymsalen eller andre stadar.

– Derfor hadde vi lyst å laga eit smittevernvenleg alternativ, ein aktivitet som kunne skapa julestemning hos store og små, fortel Rebecca Hoff Vangsnes og Elisabeth Andvik.

Dei er del av Torsneset Velforening, det nye bustadfeltet ytst på Røtinga, som står bak rebusen.

Resultatet blei ein jule-rebus med 24 postar og, ved den siste posten, ein postkasse der du kan senda ei teikning til julenissen.

Mykje folk i terrenget

Jule-rebusen startar nær Gjelevika og Inkafabrikken og følgjer stien til Eventyrskogen, vidare til Kobbavågen og på Pilabruo over Skitnavågen til Trollskogen ved fyret på Torsneset.

David Nathaniel i Trollskogen i siste del av løypa. (Foto: KVB)

Løypa er i ganske flatt terreng, men rundt 3 kilometer lang pluss knappe 2 kilometer på asfalt tilbake til Gjelevika, om du har parkert der.

– Nokre har delt turen opp, andre tok heile rebusen på éin dag. Det var mykje folk i terrenget, både dei som bur her, og gjestar frå Lysefjoden og andre krinsar.

Rebusen opna onsdag 2. desember og søndag 13. desember er siste dag for mottak av løysingsord.

Arrangørane var heldige med vêret den første helga, og i mørketida vi no er inne i såg det ut som om mange sette pris på litt dagslys.

– Alle som vil delta i rebusen er velkomne! Det går naturlegvis an å gå i løypa om ettermiddagen òg, men ta med lykt og ekstra batteri, for det blir fort mørkt!

Det er gratis å delta, men mogleg å vippsa nokre frivillige kroner til arrangøren, som har mål om å bygga seg ei grillhytte på leikeplassen i nabolaget.

Celine Madelen fekk ei matteutfordring på nest siste post. (Foto: KVB)

Fotspor-app og fine premiar

Dei driftige arrangørane har fått sponsa ei rekkje premiar. Både leikebutikk, klesbutikk, jernvare, apotek og daglegvare er blant sponsorane - det same er Oseana og Osbadet.

– Deltakarane tar med seg penn og papir. Når dei har eit løysingsord sender dei oss dette på epost (julerebus.torsneset@gmail.com), fortel Elisabeth, som har delt arrangementet på fleire Facebook-grupper.

Rebusen er lagt inn på appen «Fotspor» med id 4M41G.

– Det kan vera lurt å lasta ned kartet på forhånd, for det er dårleg dekning i delar av løypa. Med Fotspor-appen dukkar dessutan oppgåva opp når du er 30 meter frå posten, så du kan sleppa å hamna i kø eller for tett på andre deltakarar.

To familiar, den eine med gjestar frå Oslo, ved nissen sin postkasse. (Foto: KVB)

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.