Daniel (12) imponerte med ny finaleplass

Bildeserie:

1 av 1

12 år gamle Daniel Myklebust Fjellstad var så kul, då Midtsiden møtte han før avreise til Førde og debuten på Landsskytterstemnet, at han sa at han reiste for å vinna.

No har han skote seg til to sjanser til nettopp det. Allereie førre helg skaut han seg til finalen på feltskytinga med 30 treff.

Tysdag skaut han 100 meter bane og imponerte under særs vanskelege skytetilhøve. Midtsiden, fekk som akkreditert presse, sitta bak skyttarane på standplass og la merke til korleis vimplane bles i alle retningar. Både før den andre og den tredje skytinga korrigerte ungguten på siktet for å kompensera for vinden.

– Eg såg det blåste først den eine vegen, så då skrudde eg på sikte. Så såg eg at det bles den andre vegen, så då skrudde eg andre vegen, forklarte han då skytinga var over.

– Har gjort det veldig, veldig bra

Daniel skaut 244 (av 250 poeng) på dei 25 skota og trudde ikkje då at han skulle gå til finalen på bane.

– Eg er likevel veldig godt nøgd med korleis det gjekk. Eg har jo allereie ein finale på felt på fredag. Det blir kjekt, eg gler meg veldig.

– Om eg ikkje vinn, så blir eg ikkje skuffa. Eg har allereie gjort det veldig veldig bra, smilte Daniel før han la til at det var stas å vera på landsskytterstemnet for første gang og bu i bobil som familien hadde fått gåvekort på til jul.

Daniel endte på 25. plass og med finaleplass fredag.

Celine starta best

Os skyttarlag stilte med heile seks skyttarar i rekruttklassa tysdag. I særs varierande vêr med regn, vind, sol og blåst viste det seg etterkvart at det skulle bli ein særs god dag for osingane.

Celine Daviknes Hårvik, som var først ut av osingane, enda til slutt på 12. plass i den innleiande skytinga med 246 poeng. Det gjer at ho ligg i det siste laget som skal ut på finaleskytinga.

Skuffa finalejenter

Dit tok også Adelheid Røttingen Møller (242) , Sofia Dale (242) og Maren Evensen (240) seg.

Dei to sistnemnde var skuffa over eigen innsats då Midtsiden snakka med dei rett etter skytinga.

– Eg er ikkje nøgd, konstanterte Maren kort.

– Eg er skikkeleg misfornøgd, supplerte Sofia.

Begge har skote betre resultat tidlegare, men sleit med å takle vinden tysdag. No kan siste årsrekruttane likevel gle seg i campen over at dei tok seg til finalen.

Vegard Heimdal, hadde som dei andre mykje vind, og skaut 230 poeng. Vegard skaut fint samla, men diverre litt til sides for tiaren.

Midtsiden si samleside: Alt om skyting