Daniel ny næringssjef i Os

Lysefjorden-guten Daniel Skotheim (35) er i dag tilsatt som ny næringssjef i Os kommune.

Skotheim er i dag merkevaresjef i Hansa Borg Bryggerier og sit i London. No flyttar han heim.

– I kravspekken til stillinga spesifiserte vi at vi ønskja ungdommeleg pågangsmot og nokon som var på veg opp og fram. Som var sulten og hadde visjoner og vyer. I Daniel har vi funne alle desse eigenskapene, seier rådmann Christian Fotland.

– Daniel har i prosessen utmerka seg. Han kjenner Os godt og har klare tankar om både næringsutvikling og stadsutvikling. Han har gitt eit solid og godt inntrykk, i tillegg til at han har ein tung akademisk bakgrunn.

– Eg er utruleg godt nøgd med at Daniel har takka ja, seier rådmannen.

Skotheim er utdanna siviløkonomi frå NHH og har i tillegg tatt gründerskulen i Boston.

– Eg gler meg

Skotheim fortel til Midtsiden at han gler seg til å ta fatt i den nyoppretta stillinga.

– Eg er veldig nøgd og gler meg stort over at eg blei tilbydd stillinga. Eg er veldig klar til å ta fatt på utfordringa, seier Skotheim i ein rask kommentar mellom andre oppdrag.

Fantastisk prosess

Rådmannen Christian Fotland fortel om ein fantastisk prosess i arbeidet med tilsettinga.

– Det har vore heile 50 aktuelle søkarar, mange med tung næringslivsbakgrunn eller bakgrunn som næringslivsleiarar, men vi valde altså ungdommeleg pågangsmot, seier Fotland.

Skotheim startar i stillinga 15. august.