Dårleg vêr er god butikk

- I år har det ikkje vore eit einaste ledig sete på flya vår til Kypros i juli, fortel dagleg leiar i Vitaltour Hans Parnefält.

Fortsatt billig i august
Også august ser ut til å bli ein bra månad for Vitaltour.

På dei to første avgangane i august er det berre få plassar igjen, medan det i slutten av august framleis er mogleg å få seg ein rimeleg sydentur fortel Parnefält.

Litt treigt i juni
Det at det var rimeleg bra vêr i juni, og at mange osingar har båt og hytte dei ønskjer å bruka om sommaren, gjorde at flya ikkje blei fulle i juni.

- Vi er sårbare for vêret. Når det var såpass bra som det var i juni trur eg mange venta med å bestilla seg sydentur i håp om at dei skulle få fine veker på sjøen eller hytta i staden.

- Når det ikkje blei skikkelig sommar opplevde vi at dei kom til oss for å få i alle fall éi veke med sol og varme, seier Parnefält.

- Kor skal eg?
Ei av dei som kom seint og fekk plass i juli avslutta samtalen ho hadde med Vitaltour med spørsmålet: «Kvar er det eg skal?»

Då hadde ho allereie bestilt og betalt reisa, men kor ho skulle var ikkje viktig, sol og varme var det einaste som var i fokus.

Parnefält synes dette er eit godt eksempel på korleis ein del av kundane har hatt det i sommar.

Ikkje uspesifisert
Men dei fleste som skal på tur legg planane litt tidlegare, og ei endring solsjefen har merka seg er at kundane i aukande grad ønskjer å veta kva dei får. Derfor kjøper dei ikkje nødvendigvis dei billigaste plassane, men ser meir på kva hotella har å by på.

- Verken kundane eller vi ønskjer oss uspesifiserte plassar. Eg meiner vi har blitt flinkare på å sy saman gode tilbud saman med leverandørane våre. Det at kundane vel disse framfor uspesifiserte er kjekt å sjå.

Jobbar med eit ekstra fly i haustferien
Når vi spør om korleis hausten ser ut fortel Parnefält at det byrjer å dra seg til. Fleire avgonger i oktober er allereie fulle.

- Haustferieflyet vårt 7. oktober byrjar å bli fullt, så no prøver vi å få til eit ekstra fly den 11. oktober fortel Parnefält, som samstuden fortel at dei kan skaffe billetter til EM-kvalifiseringskampen mellom Kypros og Noreg den 8.

Pakker egne reiser
Hos Os reisebyrå fortel Kjersti Fjellvang også om stor pågang.

- Når kundane kjem til oss har dei gjerne sjekka dei store turoperatørane som StarTour, Ving og Apollo, men ikkje vore klar over dei mindre som Detur og Vitaltour, så vi har solgt ein del på desse, fortel Fjellvang.

- Dersom det ikkje har vore restplassar å oppdrive hos charterselskapa har vi hjulpe folk med å sy sammen egne turar der vi har funne fly og hotell kvar for seg for så å setta det saman til ei pakke, seier Fjellvang.

Direktefly viktigast
- Kor reisa har gått har ikkje vore det viktigste for kundane vi har hatt innom i sommer, berre det har vore direktefly og betre vær der dei har komme, fortel ho.

Auking i cruisetrafikken
Fjellvang fortel at dei opplever ei auka pågang etter cruise i Middelhavet.

- Stadig fleire har fått augene opp for denne måten å ferie på. For omlag tusen kroner døgnet får ein alt ein treng av overnatting, mat, underhaldning og aktiviter ombord i båtane. I tillegg får ein jo oppleve forskjellige byer og stader rundt Middelhavet, seier reisebyråsjefen.

Flyhopping
Ein annan måte å oppleve fleire stader på er å «flyhoppa» rundt i Europa.

- Eg gjorde denne varianten sjølv i sommar. Først ei par dager i London, før turen gjekk til Milano og Warszawa. Eit par dager i kvar by blei avslutta med badeferie i Østersjøen ved Gdansk.

- Om ein vel ein slik variant anbefalar eg å hiva seg på ein tre – fire timars sightseeingtur i storbyane. Det er ein ypperleg måte å få sett byane på, avsluttar Fjellvang.