– De er historiske!
Video: Nore Neset ungdomsskule var fylt til randen då elevar, lærarar og føresette var med på den offisielle opninga måndag ettermiddag.
Bildeserie:
Ein bunadskledd ordførar, Terje Søviknes (Frp), var tydeleg stolt då han sto for den offisielle opninga av Nore Neset Ungdomsskule måndag ettermiddag.
– Du ser, den er allereie sprengt, sa rektor Anne F. Fristad, med eit glimt i auge då ho introduserte opningstala til ordføraren.
Eit historisk augeblikk
I foajeen var det ikkje ein sitteplass å oppdriva, nær 1000 elevar, lærarar og føresette hadde tatt turen for å få med seg det historiske augeblikket.
– Dette er første gong på 55 år vi opnar ei ny ungdomsskule.
– De er historiske, helsa Søviknes til dei 329 elevane som byrja skuleåret på Nore Neset Ungdomsskule.
– 155 millionar kroner har den kosta, det blir omlag ein halv million på kvar av dykk.
– Den er rigga med det beste av utstyr som finst innan skulesektoren. Truleg er det den finaste ungdomsskulen i heile Hordaland, ja kanskje i heile landet, så ta godt vare på den, oppmoda ordføraren.
Ei kulturstove
I gåve hadde ordføraren med eit piano til skulen.
– Med dei fasilitetane de har her, skulle det berre mangla om de ikkje hadde eit slik.
Prosjektleiar Tor Inge Døsen var truleg like stolt og kry som ordføraren.
– Dette er ikkje berre ei skule, men òg ei ny kulturstove.
– Eg vonar de kjem til å bruka huset, ikkje berre til undervisning på dagtid, men òg utover ettermiddagane og kveldane.
– Med den dugnadsinnsatsen eg veit finst i krinsen, håpar eg ein kan få til mykje spennande i denne flotte bygningen.
– Ordførar, den står ikkje tilbake for Oseana på nokon måte, smilte prosjektleiaren med eit glimt i auge, og viste til at her hadde øvingsromma dagslys allereie frå dag éin.
Sambaen var laus
Til å leia den første skuledagen hadde rektor fått med seg «The Brazz Brothers». Saman med elevane hadde dei sydd i hop eit program eit kulturhus verdig. Her var det fengjande rytmer frå sydlegare strøk, inspirert frå både Afrika og Brasil.
– Vi har turnert mest i heile verda og sist no i Brasil, men aldri spelt i eit så flott hus.
– Eg håpar kreativiteten vil blomstra og at de utnyttar dei fasilitetene som er gjeve dykk, helsa Jarle Førde i Brazz Brothers før han bles elevane i gang.
Video (2:46 min): Sjå klipp frå dei musikalske innslaga med The Brazz Brothers og elevane frå Nore Neset ungdomsskule
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.