Viktige grep på 70-talet: Tore Grindevoll (t.v.) kontakta Rune Mowinckel-Nielsen då han ville ha liv i roklubben igjen. (Foto: Kjetil Vasby Bruarøy)

Dei fekk liv i roklubben igjen

Tore og Rune sitt initiativ på 70-talet fekk mykje å bety for roklubben, som under UM laurdag kunne feira 90 år.

image
image
image
image
image
image
image
image
Av: Kjetil Vasby Bruarøy

Laurdag var det ungdomsmeisterskap i roing i regi av Os Roklubb. Roarar frå 10 til 20 år, frå til saman 10 klubbar, stilte opp.

Blant anna var Trondheim, Moss, Bærum, Sarpsborg og Årungen, stilte opp, representert, og dei fekk i tillegg med seg kapproing mellom eit lokalt lag med ordførar Terje Søviknes som ein av tre roarar, og eit gjestelag, i seksæring oselvar.

Årsaka til æresrunden i oselvar var markeringa av at Os Roklubb i år er 90 år.

Stifta i saltvatn

Roarane i Os har ikkje alltid hatt Ulvenvatnet som trenings- og konkurransearena.

– Klubben blei stifta som Roklubben Kamp i 1924. Olav Askvik var sentral og Seinaskjeret, rett utanfor Kysthospitalet, var base. Der hadde klubben også eit lite naust med båtar i, fortel Tore Grindevoll.

– Den gong rodde medlemmane berre nasjonale båtar, oselvaren, dei hadde ikkje båtar til internasjonale konkurransar, supplerer Rune Mowinkel-Nielsen.

Tore og Rune fekk på 70-talet liv i roklubben igjen, og 5. desember 1977 blei namnet endra til Os Roklubb.

Importert hjelp frå Fana

Olav sin nevø, Jan Askvik, var ein ekstra talentfull roar. Senare blei han medlem i Fana Roklubb, og rodde også internasjonalt.

– Eg ville ha fart i klubben igjen på 70-talet, då var det heilt stilt. Eg blei tipsa av Jan at det var ein engasjert og flink mann med bakgrunn frå klubben i Fana som hadde flytta til Os, fortel Tore.

Han tok kontakt med Rune Mowinckel-Nielsen, som flytta til Os i 1975.

– Klubben hadde 13.000 på konto og to singelscullarar som hang som to bananer oppunder taket på eit naust på Særvoll.

– Vi brukte pengane til å kjøpa to nye scullarar og klubben var i gang.

Sterk klubb med nytt namn

Tore har minne frå då han følgte Jan Askvik til rostemne på Austlandet, og speaker ropte opp klubb etter klubb med stadnamn. Då speaker kom til klubben frå Os meiner Grindevoll at det noko mumlande blei lest opp «eh, roklubben Kamp», utan å nemna kvar klubben var frå.

Styret var med på å endra namnet til Os Roklubb, som sidan har halde fram med å setja Os på kartet.

Saman med gamle bilde og lister og bilde av styremedlemmar og æresmedlemmar heng det skjema over høgdepunkt frå Os Roklubb frå 1986 til 2011.

Os Roklubb har tatt nesten tallause medaljar i NM, fleire NM-gull, nokre nordiske gull og fleire gode internasjonale plasseringar.

Namn som Sissel Lothe, Bård Alfred Monsen og Lars Erik Jansen går igjen frå 90-talet fram til godt ut på 2000-talet. Framleis viser klubben seg som sterk, roarar som Amund Bjørnevik, Lars Kristian Moberg, Erling Øyasæter, Arne Hadler-Olsen og Mattias Haugland har vore i noregstoppen dei siste åra.

– Vil ha dei inn før dei blir puddingar

Tore Grindevoll er framleis full i initiativ og synspunkt når det kjem til rekruttering og trening av roarar.

– Før var det aldersgrense på 12 år. Ungane måtte kunna svømma og vera gamal nok til å ta imot skikkeleg instruksjon. Men eg eg ville ta denne grensa ned til ti år, og framleis bør vi få grensa yttarlegare ned, meiner han.

– Vi må få tak i ungane før dei blir puddingar. Sjå på 4-5-åringar, dei er spreke alle saman. Men så kjem playstation og andre passiviserande tilbod, ungane mister det atletiske ved seg, dei aller færraste 10-åringar i dag er vant med å pressa seg fysisk.

Roklubben, som seinare flytta frå Askvik til Teinevika ved Borgen i Ulvenvatnet, og så til Sigurdsvika, fekk klubbhus i 1984 og etasje nummer to på klubbhuset i 1995.

«Kan eg få ro?»

Med det same siste heat var ferdig gjekk ordførar Terje Søviknes saman med Tore Grindevoll og Odin Hjelm Sørstrønen om bord i ein ny-ausa oselvar.

– Båten har lagt på land i fire år så den lekk som ei sil, sa Simon Bjørnevik, i stuss på om han skulle senda ein ausar med om bord.

I gjestebåten hadde dei ikkje tatt skrekken. Då 15 år gamle Synne frå Sarpsborg tidlegare på dagen såg to oselvarar ligga under vatn i fjøra, spurde ho kva dette var for noko. Etter at ho fekk forklaringa kom det spontant: «kan eg få ro?».

– Det er kult å prøva noko nytt og stas å ro nasjonalbåten. Dette er første gang, seier den aktive ro-jenta.

Med seg fekk ho Aksel frå Ålesund og Morten frå Bergen, og dei tre ungdomane fekk litt å stri med.

Sjølv om snittalderen var høgare i Os-båten, og ein ordførar som helst bruker motor når han drar hummarteinene sine, blei det tett løp til mål og ein knapp heimesiger.

Søviknes gjekk på land, heldt tale, gav blome og Os inspirerer-skilt og delte ut premiar til dei beste roarane under UM 2014.

 

 

Fleire saker