midtsiden

Dei første kjøparane

Onsdag kveld blei dei første husværa i Os Sjøfront selt.

Av: Kjetil Vasby Bruarøy

For ei veke sidan gjekk fristen for å melda interesse for å bruka forkjøpsrett ut for medlemmar av Storbergen Boligbyggelag, i kveld blei tildelingsmøte halde på Bjørnefjorden Gjestetun.

- Den formelle delen av møtet starta klokka 19, men vi hadde folk på plass frå klokka 17.30 av, seier administrerande direktør i Storbergen Boligbyggelag, Anne Gine Hestetun.

Nokre kom for å snakka med arkitekt før møtet, andre ville ha ein samtale med meklar før tildeling og kontraktskriving.

Fekk ikkje førstevalet
Utanfor gjestetunet møtte vi ekteparet Kirsten og Nils Sandtorv, opprinneleg frå Austevoll, men busett på Hjellestad sidan 1967.

- Vi har lenge snakka om å flytta til Os, og då dette prosjektet blei lagt fram fann vi ut at det var på tide, fortel dei.

Båtplass er viktig for ekteparet og ei viktig årsak til at sjøfronten freista.

- Det var tredje etasje i H-blokka som var førstevalet. Vi fekk husvære mot Oseana og Mobergsvikjo i H-blokka, men sidan førstevalet blei tatt av nokre med høgare ansiennitet blei det andre etasje på oss.

No skal det dei meiner er eit litt for stort hus på Hjellestad seljast.

Vil nærmare sentrum
Eit anna ektepar som kom ut frå møtet med nytt husvære ville vera anonyme.

- Vi er frå Os og har vener i det etablerte bustadfeltet over Os Sjøfront, så vi tør ikkje stå fram med namn, seier dei to og ler.

Fleire naboar har vore kritiske til høgda og redd for både eigen utsikt og det dei meiner er for massiv utbygging på Mobergsneset.

- Men vi har eit hus som er for mykje å halda og ville ha noko enklare. Først vurderte vi seniorbustad på Lurane, men fann ut at det var betre å kjøpa nærmare sentrum og sjøen.

Både Sandtorv og dei anonyme har nokre få veker gamle medlemsskap og nykjøpt husvære i andre etasje i H-blokka.

- Ein spennande dag
Anne Gine Hestetun fortel om god stemning med både kjøpeklare deltakarar og positive, men ikkje heilt signeringsklare interessentar på møtet.

- Eg har ikkje tala klare, dei får du få seinare. Men vi har hatt ein god og spennande dag.

Storbergen stilte med ei bemanning på 15, og fekk det travelt med kontraktskriving.

- Nokre ville tenka litt på det, spesielt dei som skuffa måtte sjå at andre tok både førstevalet og andrevalet på eldre medlemsnummer. Andre var kjøpeklare og då var det godt å ha mange til å ta hand om dei som ville signera kontrakt, seier ho.

- Blei den dyraste selt?

- Nei, det meiner eg at den ikkje blei, seier Hestetun.

Fleire saker