Dei viktige prinsippa i sjølvforsvar

Bildeserie:

1 av 8

Førre helg var den israelske kampsporteksperten dr Rony Kluger i Os for å halda kurs i effektivt sjølvforsvar.

Over 20 deltakarar møtte fram, nesten halvparten kvinner, nokre av dei med kampsporterfaring, andre utan.

– Dette er det beste kurset eg har hatt her til no. Det er ei fint samansett gruppe både i erfaring, kjønn og alder, her får alle bryna seg på relevant motstand, seier Kluger.

Tok dottera med på kurs

– Eg trener taekwondo og har med meg dottera mi og ei venninne. Det er greit at dei kan litt sjølvforsvar og dei er i ein alder no der eg tenkjer at det er ekstra viktig, seier Laila Knutsen.

Dottera Celine og venninna Krista Gutmane er utan erfaring, men likte seg på kurs.

– Vi har lærd å koma oss laus frå grep og kva punkt vi skal angripa, seier Krista.

Auge, hals, skritt og kne er like sårbare uansett kor sterk motparten er.

Ei anna kvinne på kurset, Hege R. Jacobsen, trener også taekwondo.

– Eg trente karate med Cato Bruarøy på 80-talet. Eg var òg på krav maga-kurs med Cato i fjor haust, og det var veldig bra. Når Kluger no kom til Noreg var det klart at eg ville stilla.

– Prinsippa er viktigare enn teknikken

Det blei 6 timar undervising laurdag og 4 søndag. Mellom kvar øving kom grundige forklaringar og tovegsdiskusjon med deltakarane, både om situasjonen, om den var reell, og kva alternative angrep og forsvar som unne vore realistiske.

Så fekk kursdeltakarane øva, med instruksjon om ikkje å gjera det for enkelt for kvarandre.

– Det er viktig at øvingane er så reelle som mogleg. Samtidig kan angrepa vera noko ulike enn akkurat det vi øver på, det veit du aldri. Derfor er prinsippa viktigare enn teknikken.

– Kva håper du at deltakarane sit igjen med etter kurset?

– Eg håper dei blir meir bevisste på kva situasjonar og omgjevnadar dei plasserer seg. Ofte kan du merka om det er god kjemi der du er, anten det er ein fest eller eit område utandørs. Stol på magekjensla og hald deg unna stadar der du føler det kan vera fare for konflikt.

– Og så håper eg dei hugsar prinsippa vi har snakka om denne helga, korleis du forholder deg til eit angrep og kva du går etter i ditt motangrep.

For første gong hadde gjesteinstruktøren òg ei eigen økt med teori.

– Du tenkjer gjerne at det ikkje skjer deg, men fleire av deltakarane denne helga fortel at dei har vore utsette for fysiske angrep.

Repetisjon og mengdetrening

Grundig øving på teknikkar og bevisstgjering av dei viktigaste prinsippa kan vera til avgjerande nytte.

Samtidig er god fysisk form alltid ein fordel og kampsporttrening med fast frekvens bra for både timing, handlekraft og teknikk.

– Fleire kursdeltakarar startar med kampsport etter å ha gått på kurs. Andre, som ikkje har tid eller lyst, kan koma tilbake på komande kurs for repitisjon og påfyll. Eg veit ikkje kor tid Kluger kjem til Noreg neste gong, han må bookast lang tid i forvegen og denne gong blei det i skuleferien.

– Men eg og fleire av kursdeltakarane er allereie utdanna krav maga-instruktørar og det blir minst eitt kurs til no i haust. Dette er både for dei som ikkje kunne no i helga og dei som vil repetera, seier Cato Bruarøy.