Delar av det sterke startfeltet på lang løype, 6.650 meter rundt Ulvenvatnet. (Foto: Kjetil Vasby Bruarøy)

Deltakarrekord og løyperekord i Ulvenvatnet Rundt

Resultat og stor bildeserie frå løpsfesten på Kuventræ.

image
image
image
image
image
image
image
image
image
image
image
image
image
image
image
image
image
image
image
image
image
image
image
image
image
image
image
image
Av: Kjetil Vasby Bruarøy

Måndag arrangerte Os Turn Friidrett Ulvenvatnet Rundt for tredje gong.

Løparane hadde vekslande vêr, med sol mesteparten av tida, men haglbyge midt i lengste distanse.

Løpet har tre distansar:
Kort løype (6-11 år): 600 meter
Mellomlang løype (11-14 år): 1.850 meter
Lang løype (15+): 6.650 meter

Deltakarmengda auka frå 29 til 61 frå 2017 til 2018.

– Vi hadde håpa å passera 100 i år, men er nøgd med 90 deltakarar og ny rekord, seier Åge Gulbrandsøy frå Os Turn Friidrett.

Dei 90 deltakarane fordelte seg ganske likt på dei tre distansane; 34 i kort løype, 22 i mellomlang løype og 34 i lang løype rundt Ulvenvatnet.

Siger og ny rekord til Geir S. Skaten

Geir Storetvedt Skaten frå Gular, som vann i 2017, deltok ikkje i fjor. I år vann han med tida 25.09,6, og slo dermed løyperekorden sin på 25.52 frå 2017.

– Eg opna for hardt, Håvard Austevoll drog tempoet voldsomt opp. Eg låg litt bak til vi kom til brua over E39, då la eg meg i tet. Heldigvis heldt det heilt inn, men i dag var det nok Klas Færøvik som disponerte løpet best, seier Skaten.

Klas frå Opptur Motbakkeklubb, som vann med tida 27.03,3 i fjor, kom i mål på 25.33,6 i år, også det betre enn førre løyperekord.

– Eg låg på 4. og 3. plass ei stund og bestemte meg for ikkje å prøva å ta det store jafset fram til Geir. Men eg følte eg hadde kontroll på Håvard. Han imponerer meg, på veg tilbake i form, og langt tyngre enn oss andre i tet.

Håvard Austevoll kom i mål på 25.52,1, ei tangering av førre løyperekord.

Kristin Lunde raskast av damene

Kristin Lunde var raskaste kvinne. Ho kom i mål på 31.39,7, drygt to minutt bak løyperekorden til Christina Forstrønen Bruarøy frå i fjor (29,20,3).

– Eg kjenner det godt i akillesen etter Bergen City Marathon, og hadde plan om å ta det roleg, men blei riven med ute i løypa. Det var eit veldig gøy løp, synest debutanten Kristin.

Nest raskaste kvinne blei Hanne Liland frå Varegg. Ho kom i mål på 33.15,8.

Skulle heia - meldte seg på og sette rekord

Birk Nerhus frå Fana IL var i utgangspunktet på Kuventræ for å heia på onkel Klas, men svarte ja då Klas spurde om ikkje han ville løpa.

– Eg er i utgangspunktet ein sprinter, og er best på 60 meter og 200 meter, men det er kjekt å springa lengre distansar òg, synest Birk.

Han fyller 11 år i år, og sette ny, uoffisiell løyperekord i mellomlang løype (1850 meter, 11-14 år) med tida 7.39,7.

Rett bak kom Håvard Lunde, son til tidlegare Os-kaptein Stian Lunde, med tida 7.40,6.

Familien Sælen debuterte med stil

I den kortaste løypa var Thomas Heggland Sælen først i mål.

– Eg var med på Mobergslio Opp òg, men det er første gong eg deltar i dette løpet, seier Thomas.

Han var ikkje den einaste i familien som debuterte i Ulvenvatnet Rundt. Storesøstera Martine blei tredje raskaste jente i mellomste løype, pappa Tore kom på 9. plass med 29.13,3 i lang løype.

Sjå fleire resultat i bildeserien over - sjå komplett resultatliste på eqtiming.no.

Os Turn Friidrett arrangerer Osløpet laurdag 24. august.

Løpet samlar over 250 deltakarar - les meir og sjå bilde frå 2018.

Fleire saker