Den dagen kamera ikkje var på

– Foreldra mine var jo der, men det var mykje folk og mange vaktar, og då kongefamilien kom så kom dei ikkje i posisjon, fortel Sondre.

Han var hyra inn då kong Harald og dronning Sonja skulle feira 25 år som par, saman med kameraten Preben Lilletvedt var han blant dei som lagde show for kongen, dronninga og kronprinsparet då dei var i Bergen laurdag 25. juni.

– Eg vurderte å legga eit Go-Pro-kamera på bakken, men var redd for at vaktane ville fjerna det.

Heller ikkje rikspressen, som følgde kongefamilien, fekk med seg akkurat denne sekvensen.

VIDEO: Sjå Sondre triksa under Eat, Move, Sleep-cup på Kuventræ i juni

To minutt med trygge triks

Sondre og Preben hadde førebudd eit program dei rekna med at kongefamilien ville setja pris på, men som samtidig var nokonlunde «safe».

– Eg hadde jo ikkje lyst å mista ballen i bakken på ein sånn dag.

Då det kongelege følgjet kom til trikseposten stoppa dei opp og fekk med seg heile det to minutt lange trikseshowet.

Nærkontakt med kronprinsparet

Etter showet, då følgjet skulle vidare, kom kronprinsparet Haakon og Mette Marit bort til dei to fotballtriksarane.

– Det var heilt uventa både for oss og arrangørane, det sto visst ikkje på programmet.

– Men det var veldig hyggeleg. Eg kom ikkje på å bruka nokon spesiell høfleg tiltale, det blei ein vanleg samtale der dei gav mykje ros. Haakon sa han syntest vi var sinnsjukt flinke og Mette Marit sa ho blei litt redd då eg tok backflip med ballen mellom beina.

Ofra NM - Skal til VM

Sondre droppa NM og kampen om ein plass på landslaget for å triksa for kongefamilien, eit oppdrag som kom same helg som noregsmeisterskapen.

Nærmast dagleg filmar han seg sjølv for å dela triks på Instagram (sondrefreestyle), der han har 17.700 følgjarar. Denne dagen blei det ingen digitale minne.

Likevel angrar han ikkje på at han takka ja til oppdraget.

– Det var ei veldig fin oppleving. NM kan vi stilla i til neste år, og eg skal uansett til VM i Praha seinare i sommar, seier Sondre.