Sverre Lunde Pedersen - Slåtthaug 2018

Den dårlege - men viktige heimebanen

Der OL- og VM-meistrane blei fostra: Vi har vore med Sverre på styrkerom og utandørs-is på Slåtthaug.

Av: Kjetil Vasby Bruarøy

I går tok Håvard Holmefjord Lorentzen gull i sprint-VM, måndag for ei veke sidan kom klubbkameratane Sindre Henriksen og Sverre Lunde Pedersen heim frå OL, der dei tre løparane frå Fana il hausta tre individuelle medaljar, og der to av dei var med på å ta gull i lagtemo.

• Sjå bildeserie frå Flesland: Varm velkomst då gullgutane kom heim

Håvard: Gull på 500 meter og sølv på 1000 meter.
Sverre: Bronse på 5000 meter.
Sindre og Sverre, saman med Håvard Bøkko: Gull i lagtempo

Om Fana var ein eigen nasjon ville dei vore den 13. beste i årets OL.

I verdstoppen - trass treningsforholda

Heimebanen til Fana il er Slåtthaug, Bergens einaste utandørs kunstisbane, opna i 1991.

Torsdag var Midtsiden med Sverre på trening innandørs på Slåtthaug, og på ein runde for fotografen ute på isen.

I videointervjuet over ser du kva han seier om treningsforholda, som har vore så viktige for løparane som i dag er i verdstoppen, men som likevel ikkje kan samanliknast med treningsforholda andre aktive løparar har.

Ujamn smelting 

– Slåtthaug er blant Bergens best besøkte idrettsanlegg, men det er det i hovudsak mosjonistar som står for. Fana il har treningstid 2-3 timar tysdag og torsdag og frå 10 til 12 laurdag og søndag, seier styreleiar i skøytegruppa i Fana il, Sigbjørn Rabbe.

Klubben har rundt 200 medlemmar som står på skøyter, 70-80 av desse er aktive i konkurransar.

– Utfordringa med is utandørs er naturlegvis både lengda på sesongen og kvaliteten på isen. Isen er av internasjonal storleik, men er utsett for både ujamn smelting, regn og hagl. Hagl er det verste. Isen er krevjande i halda, og i fjor måtte vi legga isen på nytt tre gongar.

Det gror også godt bak Sverre & co. Rabbe har ikkje tal på kor mange medaljar Fana tok i landsmeisterskapen nyleg, men idrettslaget hadde medlemmar på topp tre i alle årsklassar. Den siste veka har fleire av dei beste vore i junior-VM i USA og i uoffisielt EM for aldersbestemt i Nederland.

Kan få tak over Slåtthaug i 2019

På velkomstseremonien på Flesland blei det frå publikum ropt om ny skøytehall i Bergen.

– Tak over isen på Slåtthaug er ferdig regulert, og etter årets sesong startar arbeidet med å bygga ny parkering.

– Men finansiering er førebels ikkje på plass. Det er Bergen kommune som eig anlegget, men det er lagt opp til privat finansiering.

Rabbe reknar med at om alt går vegen med finansiering og sponsorar kan det bli byggestart våren 2019.

– Det vil skapa heilt andre forhold for utøvarane våre, og for tilreisande utøvarar. Bergen har fine sykkelforhold, og sykling er viktig for skøyteløparar. Med tak over Slåtthaug kan vi få ein lengre treningssesong på is.

Til helga går VM allround av stabelen, utandørs i Amsterdam. Helga etter er det verdscupavslutting i Minsk.

• Les òg: – Det kan bikka begge vegar (Sverre om formtoppen i OL og dei to siste løpa i sesongen)