Den første av dei to store

Bildeserie:

1 av 4

Måndag formiddag signerte Implenia kontrakt med Statens vegvesen verdt nesten 1.463 millionar kroner. Dette er ein av dei to store kontraktane i samband med E39 Svegatjørn - Rådal.

Implenia skal fullføra parsell K11, den delen av Svegatjørn-Rådal som er i Bergen kommune. Entreprisen som omfattar Råtunnelen og Søråstunnelen, og ein vasstunnel. Den totale lengda vil vera 7 kilometer inkludert eit trafikksystem mellom dei to tunnelane.

Entreprisen omfattar også veganlegg i dagsonene i Rådal, Nordås, Sørås og ved Skeievatn. Dagsone Rådal inneheld planskilt kryss med svingar frå Råtunnelen og Lyshorntunnelen. Dagsonene ved Nordås, Sørås og Skeievatn omfattar påkoblinger til eksisterende vegar. I tillegg vil det bli bygd gang- og sykkelvegar, tre bruer, fem portalar og tekniske bygg.

Arbeidet startar i september i år. Hovudarbeidet skal vera ferdig i 2018, mens tunnelane skal opna i 2020 og vera heilt ferdig i 2021.

Veidekke i retning Os

I dag kan det bli klart om Veidekke får den andre store kontrakten i prosjektet, K10, på 2.298 millionar kroner. K10 går frå Fana til Svegatjørn.

– Vi har ikkje fått nokre signal på at det vil bli levert klage. Det er ingen som har bedd om innsyn eller varsla noko, men du veit aldri, seier prosjektleiar Sverre Ottesen til Midtsiden.

Om ingen varslar motsegn i dag kan Veidekke førebu seg på signering.

– Men vi rekk ikkje å signera avtalen før ferien er over, seier Ottesen.

Det kjem eit tredje oppdrag i prosjektet, som skil seg ut som ekstra stort. Dette omfattar elektronikk- og styringssystem, og vil ligga på rundt ein halv milliard. Men dette skal ikkje lysast ut før i 2017.

Gir store ringverknadar

Implenia har stor kapasitet innan både tunneldrift og betongarbeid, og vil i stor grad utføra arbeidet i eigenregi kombinert med et nært samarbeid med utvalte underentreprenørar.

På spørsmål frå Vest 24, om K11-kontrakten vil omfatta mange lokale arbeidsoppdrag, svarer Implenia-direktør Vistnes at dei både vil bruka intern kompetanse, men også fleire lokale samarbeidspartnarar.

Når K10 i Os er signert kan det koma til å omfatta store arbeidsmengder for fleire firma og arbeidstakarar i og rundt Os.

– Når det skal utførast arbeid for nesten fire milliardar kroner får det store ringverknadar. Entreprenørane som har deltatt i anbodsrunden har alle lista opp underleverandørar dei ser for seg å jobba vidare med som potensiell samarbeidspartnar, og etter signering går dei vidare med nettopp dette arbeidet, seier Ottesen til Midtsiden.

– Det blir mykje å gjera for mange som kjører gravemaskin og lastebilar i og rundt Os dei komande åra.

Om E39 Svegatjørn - Rådal:

• Strekninga er på totalt 17,7 km og skal gå som firefelts motorveg mellom Os og Fana. Prosjektet har ei kostnadsramme på 6,5 milliardar kroner og skal korta ned reisetida mellom Bergen og Halhjem frå fra 40 til 20 minutt.

• 14,7 av den 17,7 kilometer lange vegen blir i tunnel. Den lengste tunnelen blir den 9,2 km lange Lyshorntunnelen mellom Endalausmarka og Rådal.

• Lengst sør, frå Svegatjørn til Endelausmarka, kjem den 1,5 km lange Skogafjellstunnelen.

• Dagsona gjennom Endelausmarka blir 1,1 km lang. Her kjem også fleire store næringsområde, blant anna Lyseparken på rundt 500 mål.

• Prosjektet omfattar også ny fylkesveg frå kryss i Endelausmarka til Åsenvegen og utbetring av eksisterande fylkesveg 163 for cirka 40 millionar kroner.

• Lyshorntunnelen kjem i nord ut i Rådal, med ei kort dagsone og kryssområde på 200 meter før den går vidare i 2,2 km lange Råtunnelen. Denne kjem i fjellet vest for dagens vegsystem ved Laguneparken. Ny vegline held fram til dagens riksveg 580 sør for Troldhaugtunnelen.