Den nye storstova til Rolf Tveit

Bildeserie:

1 av 8

I dag har Best-stasjonen sin sisteopningsdag før Tveit-familien leiger ut til YX/7-Eleven, i går var det markering med kake til kundane og fest for dei tilsette.

Festen blei arrangert i 2. etasje i stasjonsbygningen, eit 284 kvadratmeter stort lokale som har stått tomt og uinnreidd sidan bygget var nytt for fem år sidan.

– Eg har hatt fleire interessentar på lokalet, men berre på delar av det, og eg ville ikkje innreia lokalet stykkevis, fortel Rolf Tveit.

No har familien bestemt seg for å ha lokalet sjølv, for å driva utleige til bryllaup, konfirmasjonar, bursdagar og konferansar.

Godt utstyrt

Arbeidet med å innreia starta for eit halvt år sidan. Golv, veggar, tak og lys er på plass - det er òg scene, storskjerm og discokule.

Toaletta er ferdige og kjøkkenutstyret er kome, men er ikkje ferdig montert. Det står òg noko arbeid igjen på baren.

– Vi skal bygga ny trapp og nytt inngangsparti. Heis er allereie på plass. Og så skal bruken godkjennast i kommunen før vi kan ta imot dei første leigetakarane.

Gårsdagens selskap var testkøyring med rundt 30 av sine eigne tilsette på fest.

– Eg er jo glad i å arrangera dans og konsertar, så det er jo mogleg at eg finn på noko sjølv, av og til. Elles ligg lokalet her, nytt, moderne og praktisk, nær buss, taxi, kyrkje og resten av Os sentrum, seier Rolf.