Den siste Trygg i Os

Bildeserie:

1 av 6

Trygg i Os er eit samarbeid mellom Os kommune og Os eldreråd.

Årets tema for treffet var «Tider som var og tider som kjem».

Tradisjonen tru var alle dei 270 billettane rivne bort på førehand, og tryggleikssjukepleiar, og ein av arrangørane, Bjørg Aspenes Sjøbu, kunne fortelja at det var venteliste på å få stå med stand i foajeeen i Oseana.

Aspenes sto sjølv i døra saman med kultursjefen i Os, og etterkvart kultursjef i Bjørnafjorden kommune, Erik Vangsnes.

Song rett i hjarta

Programmet vart opna med song av elevar ved fjerde trinn på Os barneskule.

Applausen og dei tårevåte auga i salen sa sitt om kor godt mottekne ungane var.

Konferansier Tove Hille måtte sjølv stoppa dei pliktoppfølgjande ungane på veg av scenen, for at dei skulle få ein ekstra runde med applaus.

Nye tider

Ordførar Terje Søviknes fekk jobben med å offisielt opna det som vert den siste Trygg i Os.

– Om nokre timar er Trygg i Os historie, men eg håper og trur at vi frå neste år av kan få oppleva eit Trygg i Bjørnafjorden.

Søviknes nytta taletida til å sjå framover, og på kva for endringar som kjem.

– I tida fram til nyttår skal det faktisk etterkvart vera tre ordførarar i drift i Os og Fusa.

– Eg vert verande her med Os sitt kommunestyre, Atle Kvåle med sitt i Fusa, og når det nye kommunestyret konstituerar seg i slutten av oktober, vil etter alle solemerke Trine Lindborg leia det nye kommunestyret i Bjørnafjorden.

Ny identitet

Søviknes heldt fram med å snakka om endringane som kjem i framtida.

– Det frivillege på begge sider av fjorden skal no byrja å jobba tettare saman, og fleire lag og organisasjoner har allereie slått seg saman, eller vil slå seg saman. Næringslivet har allereie kome langt i det arbeidet, og her har Bjørnafjorden næringsråd vore leiande i arbeidet med å skipa den nye Bjørnafjorden kommune.

– Men sjølv om vi no vert ein ny kommune, reint teknisk, trur det eg det vil gå mange år før vi sluttar å vera fusingar og osingar. Dette handlar om å vera menneske, og det å ha ein identitet. Akkurat den endringa kjem til å ta tid, sa Søviknes.

Takka for seg

Søviknes nytta òg høvet til å personleg takka alle i salen for tillita han hadde opplevd dei siste 20 åra, med å lesa eit dikt om livskvalitet og livsendring, skrive av Haldor Skard.

– Dette diktet har eg hatt meg i 20 år, og det har vore viktig for meg i det arbeidet eg har lagt ned som ordførar i Os.

Arrangementet heldt så fram med innlegg frå kommunalsjef for helse, Monica Totland Melvold, før det var tid for lunsj.

Programmet vart avslutta med musikk frå Jans Rock 'n' Roll Band.