Den store brødreduellen

Os Triathlon, kalla "Vestlandets vakraste sprint-triathlon", blei sundag arrangert i og ved Sigurdsvikjo i eit strålande sommervêr med godt over 20 gradar og sol frå nesten skyfri himmel.

Etter at eliten hadde gjort opp seg imellom i norgescupen var det duka for mosjonistane som skulle leggja bak seg 750 symjing, 20 km sykling og 5 kilometer løping.

Sjå stor bildeserie på Midtsiden si facebook-side.

Viktigst å slå broderen

Blant dei 87 som stilte til start var brørne Frode og Rune Vindenes. Lillebror Øystein var òg påmeldt, men måtte trekkja seg.

Ingen av dei to hadde delteke på triathlon tidlegare, og visste ikkje heilt kva dei gjekk til.

– Det viktigaste i dag var å slå Frode, fortel Rune med eit smil etter at han kom i på 1:29:35.

Halsande bak kom lillebror Frode, som måtte sjå at storebrødrene framleis er størst, Rune slo han med vel åtte minutt.

– Eg hadde vel ikkje den beste oppladinga. Eg var nemleg på utdrikningslag til ein kompis i går, unnskylda Frode seg.

Kompiskampen

Dei to brørne hadde òg ein ekstra kamp gåande.

– Vi er ein gjeng på 20 kompisar som gjennom det siste året har hatt gåande ein kompiskamp.

– Triathlonen var finalen i kampen, kor vi har konkurrert i squash, friidrett, frisbeegolf, lynsjakk, 5000 meter løping, 20 km temporitt på sykkel, Tour de France-manager.

– No blei det berre åtte av oss som fullførte finalen i dag, men eg reknar med at alle stiller på banketten, avsluttar Rune Vindenes med eit smil.

Vinnar av kompiskampen blei Cederic Valentin som brukte 1:15:33 på den avsluttande triathlonen.

Sjå komplett resultatliste frå Os Triathlon her