Den største i Etne på over 20 år

Bildeserie:

1 av 3

Det låg an til å bli ein mislykka fisketur til Etne for far og son Lyssand første veka i august.

– Fisket er best med 15-20 kubikk i Etneelva, vi sat ein kveld utan fangst i 30 kubikk vassføring, fortel Oddvar.

Tilbake på hytta var han og Ove nærmast einige om å reisa heim morgonen etter. Det var ikkje vits å fiska når elva var så stor.

Men så kom ein serie av gode avgjerder supplert med flaks.

Skulle visa kor laksen sto

Pappa Oddvar ville ned og sjå om elva hadde minka før han la seg for kvelden, kanskje det kunne bli verdt å fiska neste morgon likevel.

– «Vi kan no ta stanga med», sa eg. Vi tok med stang og håv.

Nede ved fossen såg dei at elva hadde gått ned, men førebels ikkje så mykje. Så viste laksen seg.

– Han var oppe med ryggfinna og eg ropte etter Ove. Laksen såg ut til å vera minst fem kilo.

– For å visa Ove kor eg hadde sett fisken kasta eg kroken uti akkurat der den hadde vore. Tre sekund seinare var laksen på kroken!

Kort kamp og knekt krok

Oddvar seier laksen ikkje var særleg vanskeleg å få på land.

– Han prøvde å koma seg utfor fossen tre gongar, men eg tenkte «ikkje f.». Eg var gira, Ove filma. Eg trur ordforrådet var sånn at vi bør venta nokre år med å visa filmen til barnebarna, humrar storfiskaren.

Etter ei stund kom Ove på at han hadde andre oppgåver enn å vera kameramann.

– Ove kom med håven og eg halte til og fekk fisken inn i ei rolegare bukt av elva.

Med det same laksen var i håven merka Oddvar at snøret blei slappt. Det viste seg at kroken hadde knekt få sekund etter at fangsten var sikra.

– Då Ove såg dette sa han «det står nok namnet ditt på denne fisken».

Den største på mange år

Dei skulle eigentleg berre ned for å sjå på elva og kasta eigentleg berre snøret uti for å visa kor laksefinna hadde vist seg. I tillegg var Oddvar sin fangt ekstra stor.

Laksen, som blei tatt på makk, vog 16 kilo.

Den førre rekorden for sesongen var på 13,3 kilo og det er ifølgje fiskelaget i Etne første gong sidan 2002 at det er tatt laks på over 15 kilo i elva.

– Vi fekk høyra at vi må tilbake til 1996 sist det var tatt like stor eller større fisk i Etneelva, fortel Oddvar.

Les òg: Johnny to eit beist på 18 kilo i Oselvo

Midtsiden samleside: Jakt og fiske