Denne kan du vinna

Os kommune gjer i desse dagar ein ny innsats for å nå målet om 10 millionar kroner i OKK-støtte frå folket. I dag viste dei Arne Mæland-skulpturen som du kan vinna ved å støtta.

Kjetil Vasby Bruarøytirsdag 19. mai 2009 10:35

Sommaren 2008 starta OKK-kampanjen, der innbyggjarane i Os og nabokommunane blei inviterte til å kjøpa andelsbrev til 2000 kroner eller stolsete til 10.000 kroner, som støtte til Os kunst- og kultursenter.

- Gruppa "Kulturvenar av Os" har gjeve 4,5 millionar kroner. Kjøp av andelar og stolsete utgjer like over 2 millionar kroner, fortel ordførar Terje Søviknes.

Mesteparten av støtta kom i fjor sommar, og tidleg på hausten. Men også etter at finanskrisa blei tydeleg, kom det pengar inn.

- Det var rundt 30 til 40 som fekk andelar eller stolsete til jul, fortel Søviknes.

Mæland-skulptur i premie
Arbeidet på tomta starta i april og målet er at OKK skal stå ferdig hausten 2010. Den komande veka kjem det ut ein forkorta versjon av brosjyren som starta OKK-kampanjen i fjor, der kommunen prøver å få inn dei siste 3,4 millionane som trengs for å nå målet om 10 millionar kroner i støtte frå folket.

Dette kjem i så fall i tillegg til 10 millionar kroner som ein anonym gåvegjevar kom med i forkant av kampanjen.

- Dei som har kjøpt eller kjøper andel eller stolsete har, uavhengig av sum, eit lodd i trekninga av ein Arne Mæland-skulptur til ein verdi av rundt 30.000 kroner, fortel Søviknes.

Bronseskulpturen, som har 24 karat bladgull på kjolen, heiter "Dansar". Mæland var inspirert av Anitra, jenta som dansa rundt Peer Gynt, men som han ikkje kunne få, då han lagde ein moderne versjon av dansaren.

- Med all den scenekunsten som vi skal få oppleva i kunst- og kultursenteret trur eg denne passar fint som premie, seier Arne Mæland.

Trekninga kjem til å finna stad anten under skulptursymposiet eller under eit arrangement på tomta i sommar. Frist for å "kjøpa lodd" er 4. juli, men det går også an å støtta senteret etter dette.

God privatmarknad for kunst
Sjølv om "loddet" kostar litt, er det ein flott premie og ganske store vinnarsjansar for dei som ønskjer seg ein bronseskulptur signert Mæland.

Ser du vekk frå dei større skulpturane ligg Arne Mæland sin kunst frå 5000 til 65.000 kroner i pris. Men det er likevel ikkje så få heimar i Os som har eit eller anna som Arne har laga.

- Seinast i helga var eg på avduking i ein privar hage, av ein større dansar som nokon har kjøpt hos meg. Dei hadde fått pynta fint i hagen sin, med blant anna lys og denne bronseskulpturen, fortel Arne.

- Os blir eit kraftsenter for kultur
I år er det igjen tid for skulptursymposium i Os. Os Kulturutvikling og Arne Mæland er godt i gang med førebuingane.

- Vi har opning 21. juni, og startar 22. juni. Så blir det tre veker med banking og sliping i Vognhallen. Vi har som vanleg invitert både kunstnarar som har vore her før, og nye ansikt. I år kjem det blant anna ein frå Egypt og ein frå Togo, to afrikanarar som ikkje har vore i Os før.

I dialog med kunstnarar og kulturaktørar utanfor kommunen, og utanfor Noreg, får han ofte høyra at folk er imponert over kva som er i ferd med å skje i Os.

- Det vi får til i denne vesle bygda imponerer mange, og den merksemda vi får rundt prosessen kjem til å få store ringverknadar, spår Mæland.

- Kva med deg og den kunstformen du driv med?

- Om min kunst blir stilt ut veit eg ikkje, men Os kunst- og kultursenter kjem uansett til å bety mykje for alle som driv med bildekunst i området.

- Det viktigaste er kva det miljøet vi får med galleri og kunstsamling i levande samspel med scenekunst og undervising får å bety for ungar og ungdom. I eit slikt senter blir det fantastisk for slekt, venar og anna publikum å koma og sjå utøvande kunst, seier Arne Mæland.