Sport | 25. juni 2015

– Det blir ei heilt ny verd

Friidrettsfolket gler seg over endeleg å få eit anlegg som går an å bruka, også til konkurransar.

– Det blir ei heilt ny verd
Sverre Mowinckel-Nilsen (t.v.) og Tor Inge Døsen på Kuventræ, der Os Idrettspark no er under bygging. (Foto: Andris Hamre)
Andris Hamretorsdag 25. juni 2015 07:10

– At det i det heile tatt eksisterer eit friidrettsmiljø i Os er meir på trass av enn noko anna. Berre takka vera eldsjeler har det blitt halde gåande, seier Sverre Mowinckel Nilsen.

Friidrettsdelen av Kuventræ har lagt meir eller mindre brakk sidan midten av 70-talet. Berre små justeringar og vedlikehald har vore gjort av Os Turn, som har eigd anlegget fram til Os kommune kjøpte det i vinter.

Les òg: Strålande arbeid med Os Idrettspark

– Eg kan ikkje hugsa når det blei arrangert eit friidrettsstemne på Kuventræ, det må ha vore før mi tid, seier Mowinckel Nilsen, leiar i Os Turn Friidrett, når Midtsiden møter han og prosjektsjef i Os kommune, Tor Inge Døsen, på det som er i ferd med å reisa seg frå oska.

– Nei, det er lenge sidan. Det var vel litt aktivitet på 60-talet, då spesielt med skulane. Eg hugsar skulestemner her kor den gamle tribunen var smekk full av ungdomar som heia og jubla.

– No får friidrettsmiljøet i heile Os ein gylden sjanse til å samla kreftene ein stad. Då kan vi få eit potent miljø og høg aktivitet igjen, drøymer Døsen.

Alt utanom stavsprang

Mowinkel Nilsen er snar med å rosa Døsen for at det no kjem eit topp moderne anlegg for friidrett.

– Utan Tor Inge hadde vi ikkje fått det på plass. Han har vore ei enorm drivkraft, skryt friidrettsleiaren.

I tillegg til seks felt 400 meter-bane (det same som Bislett hadde fram til «Nye Bislett» sto klar i 2005) blir det åtte felt på langsidene, tilpassa 110 meter hekk, permanent vassgrop for hekkeløp, lengedegrop med tresteg, permanent kule-ring, høgdeanlegg og eige felt for spydkast.

– No kan vi driva nær sagt alle typer av friidrett her oppe. Det einaste som ikkje kjem er stavsprang, men det treng vi strengt tatt ikkje. Det ville ha kosta meir enn det smaker, mellom anna med tanke på utstyr som er dyrt i den greina, forklarer Mowinckel Nilsen.

Tribune med tak - og nytt klubbhus

Til dei andre friidrettsgreinene kjøper kommunen inn utstyr som vil vera tilgjengeleg for alle klubbane som skal nytta anlegget.

– Vi tar den gamle kiosken på Kuventræ og lager hovudtavle og ein liten kiosk i den. I tillegg har vi kjøpt dei åtte brakkene som i dag blir nytta som midlertidlege klasserom på Lysekloster frå Vestafjell.

– Dei flyttar vi opp her og lager om til eit lite klubbhus med 120 kvadratmeter varmt areal. Det vil innehalda sekretæriat, møterom for klubbane og kommunen, ei varmestove for dei unge friidrettsutøvarane og eit varmtlager for det utstyret som ikkje kan lagrast kaldt.

– I tillegg blir det eit kaldt-lager og ein liten tribune med plass til om lag 150 sitteplassar. Tribuna får tak over seg og skal stå klar til 12. september, fortel Døsen.

Gler seg til opningsstemne

Nettopp 12. september blir ein nøkkeldato og merkedag for friidretten i Os. Då inviterer nemleg Os Turn i samarbeid med Os kommune til friidrettsstemne på Os idrettspark Kuventræ.

– Det er jo litt med skrekkblanda fryd då. Vi har jo aldri gjort det før. Men stemninga er god og interessa for det nye anlegget er veldig bra rundt i dei andre klubbane. Det er ikkje kvart år det blir bygd nytt friidrettsanlegg i Hordaland.

– Stemnet vil gå over to dagar, 12. og 13. september og vera eit stemne som famnar heile friidrettsfolket frå dei yngste rekruttane til dei eldste veteranane. Vi har kutta litt ned på tal øvingar, sidan vi ikkje har gjort det før, men det blir eit fullverdig stemne med godkjente resultat for utøvarane.

Politisk stafett

Om det går som Mowinkel Nilsen håper på vil rundt 300 deltakarar vera i sving i ein eller fleire øvingar under opningsstemnet. Men dei er ikkje dei einaste.

– Laurdag 12. september klokka 13.30 blir det offisiell opning av anlegget med inviterte gjestar og stor festivitas. Det er jo takka vera politikarane vi får eit anlegg som er alt vi kunne drøyma om og meir til, så då må dei jo òg få testa det.

– I samband med opninga blir det difor politisk stafett med 4 x 100 meter, så skal det bli interessant å sjå om dei klarar å løpe så langt. Dei får berre legga seg i trening, avsluttar friidrettsleiaren med eit smil.

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.