– Det blir ikkje lett å salta neste helg
Yr.no meldte -273 gradar fleire stadar neste søndag.
– Har du sett kor kaldt det blir på Flåten neste helg? spør Øystein Hjelle når han tar kontakt med Midtsiden-redaksjonen.
Det er venta kaldare vêr, men melding om - 273 gradar, «det absolutte nullpunkt», for dei som hugsar litt frå fysikktimane, fekk Øystein til å hutra.
– Det første eg tenkte var at det ikkje blir lett å salta vegane i Os denne dagen, seier Øystein og ler.
– Teknisk feil
Flåten i Os er ikkje einaste stad som har fått vêrmelding som ville tatt knekken på det meste.
Fleire aviser på Vestlandet og Austlandet har omtalt det overdrivne kuldevarselet, og Yr forklarer saka på Twitter:
«Ikke fortvil det blir ikke -273 grader i #Norge neste helg. Den tekniske feilen skyldes omregning fra Kelvin til Celsius. Formelen er: K = °C + 273,15»
Norsk kulderekord er forresten - 51,4 gradar, målt i Karasjok i 1886. På Yr.no kan du sjå fleire vêr-rekordar.
Finast vêr tysdag og fredag
Temperaturen i Os gjekk frå fint vårvêr og over 10 gradar i starten på vinterferien, til 3-4 gradar og sludd laurdag.
Det er meldt regn søndag og noko nedbør måndag, men tysdag er det venta sol og onsdag blir det stort sett opphaldsvêr.
Temperaturen skal ligga på 2 til 6 varmegradar.
Torsdag er det meldt nedbør og 2 til 5 gradar, fredag og laurdag skal det bli lettare vêr og truleg noko kaldare.
• Sjå detaljert vêrvarsel for Osøyro på Pent.no - som viser Yr og Storm side om side.