– Det er gratis å oppføra seg!

Tysdag kveld blei ein mann i 50-åra gripen for å forstyrra den offentlege fred og ro på kaien i Os sentrum. Resultatet blei ei natt i fyllearresten og 10 000 kroner i forenkla forelegg.

– Vi aksepterar ikkje den negative tendensen vi har sett.

– Difor har vi lagt lista lavt i høve til reaksjoner mot dei som forstyrrar offentleg ro og orden.

– Vi vil rett og slett ikkje ha det i Osbygda, seier lensmann Oddbjørn Dyrdal.

Minst 10 000 kroner

Konsekvensane av den skjerpa linja frå lensmannskontoret er eit forenkla forelegg på 10 000 kroner om du, tildømes i fylla, bråkar og lagar kvalm i det offentlege rom.

– Os har blitt som ein by på dette området.

– Vi ser det same i Bergen sentrum, fortel politiadvokat Kjersti Katrine Svendsen.

– Det skal ikkje så mykje til før vi skriv ut eit forenkla forelegg på 10 000 kroner.

– Om du i tillegg har vore involvert i slossing eller tilsvarande blir forelegget enno høgare.

– Då blir det fort ein dyr kveld, åtvarar Svendsen.

– Dessuten er det totalt unødvendig. Det er gratis å oppføra seg fint, supplerar lensmannen.

Ros til arrangørane

Sjølv om lensmannen no rettar pekefingeren, så kjem han òg med skryt.

– Dei store arrangementa som har vore i bygda så langt denne sommaren har gått veldig bra.

– Der skal arrangørane ha all mogleg ros.

– No håpar vi berre publikum på Osfest, med fleire tusen publikumarar, oppfører seg like fint, avsluttar Dyrdal.