Det er lus

Midtsiden skreiv torsdag om den store mengden aure som sto under den nedste brua i Oselva. Fleire har fatta interesse for saka og søndag blir det slegen fast at fisken truleg har kome til elva og ferskvann for å bli kvitt store lus.

- Om lus er årsaka til at fisken søkjer brakkvatn så er det heilt spesielt, fortalde forskar Steinar Kålås hos Rådgivande Biologar då Midtsiden snakka med han før helga.

No får han støtte frå seksjonsleiar Egil Hauge hos Fylkesmannen si naturforvaltningsseksjon.

– Normalt er det lite lakselus på denne tida av året, men høg sjøtemperatur kan ha gjort det enklare for lusa å formeira seg. Det er også meldt om høgt lusenivå i opprettsanlegga i Hordaland og det verkar også inn på sjøfisk, seier Hauge til NRK Hordaland.

Viss auren ikkje greier å få av seg lusa vil truleg den dø, og Hauge kjenner til at fleire døde fiskar er oppdaga i stimen i Os. Det kan få store konsekvensar for fisket i elva.

– Det er for tidleg å seia kor mange av fiskane som vil dø av dette, men me risikerer å oppleva eit kraftig tilbakeslag for bestanden i elva. Dette ser me først til sommaren, seier seksjonsleiaren.

Etter det Midtsiden kjenner til vil ekspertane gjere nye undersøkingar over helga.