- Det er over!

Rock n' LOL: - Men ikkje før vi har hatt eit skikkeleg etterparty med Datarock i Oseana, seier festivalsjef Andreas Lindborg.

Datarock spelte for 1500 ivrige fans på Rock 'n LOL i fjor. I september får dei æra av å avslutta Rock n' LOL-epoken på etterfesten i Oseana (Foto: Kjetil Vasby Bruarøy)
Andris Hamreonsdag 15. mai 2013 07:54

Ei sju år lang epoke er over. Frå den første spede starten heime i hagen til mor og far, til seks år på bakkane til Olav Valle på Sanden. Tida med Søfteland Rock n' LOL er ubønhørleg over.

- Men vi må jo ha ein skikkeleg etterfest.

Les òg: Lars Vaular til Rock n' LOL

- Difor inviterer vi til eit heidundrande party med Datarock i Oseana 21. september, fortel Andreas Lindborg.

Ikkje mogleg å løfta vidare

I november blei det kjend at brørne Andreas og William Lindborg var i tenkjeboksen på om dei orka å ta eitt år til. Etter mange gode tilbakemeldingar konkluderte dei med at, jau, det skulle bli festival også i 2013.

– No har vi bestemt oss. Dette blir siste året med Rock n' LOL.

– Vi har hatt alt av det vi synest er kult å presentera av artistar på festivalen.

– Det finnest fleire der ute, men vi har ikkje fasilitetane som trengs til å løfta festivalen eitt hakk vidare, forklarer Andreas Lindborg, som tenkjer det er greitt å gje seg på topp.

– I tillegg har vi vel nådd eit metningspunkt, seier festivalsjefen ærleg.

For alle som har hjelpt til

Sjølv om festivalen 5. og 6. juli blir den siste, så er det ikkje heilt over.

– Vi kunne ikkje avrunda det heile med sjølve festivalen.

– Då hadde jo ikkje vi fått vore med på festen.

– Vi vil takka dei som har stått på saman med oss med eit heidundrande party, kor vi slepp å organisera så mykje.

Vil fylla Oseana

Samstundes har Lindborg-brørne sett at det har vore ei utfordring med å fylla Oseana på arrangement for ungdom og unge vaksne.

– Vi tenkte at avslutningsfesten kunne vera ein fin sjanse til å fylle Oseana til randen.

– Datarock fortalte etter gigen dei gjorde på festivalen i fjor at det var noko av det kulaste dei hadde vore med på.

– Då vi ringte og spørte om dei ville gjera avslutningsfesten med oss var dei ikkje i tvil.

"Ja, sjølvsagt vil vi vera med", var svaret vi fekk.

Lindborg lovar at det kjem fleire overraskingar på festen.

– Kva det blir vil eg ikkje seie noko om, men det skal bli ein helvetes fest, lovar den avtroppande festivalsjefen.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.