– Det krevst eigeninnsats

– Men ei livsstilsendring krev eigeninnsats.

– Fleire av dei som kjem til meg får skriftlege heimelekser. Ein ting er å tenkje tankane, men du blir mykje meir bevisst når du får det ned på papiret, forklarte leiar av frisklivssentralen, Karen Hope Nilsen til tenesteutvalet torsdag.

Les òg: Ingen fanatikar

Ingen vil slutta røyke

Frå oktober til nyttår har Hope Nilsen nytta tida til å planlegga og byggje opp frisklivssentralen. Først i januar tok ho til med kursa og aktivitetane i sentralen.

– Så langt er det ingen som har tatt kontakt for å få hjelp til å slutta røyke eller snuse, men på dei andre områda har det vore god interesse.

– Eg har 11 deltakar på livsstilskurset kor vi møtast ein gong i veka fram til sommaren.

– Fleire er og med å turgruppa på onsdagane, fortalde Hope Nilsen.

– Kontakt den feite direktøren

Hope Nilsen fekk skryt av tenesteutvalet.

– Dette er fantastisk. Eg håper du i løpet av året får tid til å kontakta skulane, kanskje ungdomsskulane spesielt, i høve søvn og kosthold. Det trur eg vi kan få god gevinst av, kommenterte Anders Hjelle (TvS).

– Eg trur noko av utfordringa kan bli å gjera tilbodet godt nok kjend.

– Oppsøk bedriftane i Os.

– Eg er sikker på at du vil vera velkomen hjå han feite direktøren som treng røra seg, eller han medarbeidaren som har tenkt han skal slutta røyke i tre år, men enno ikkje gjort det.

– Malarane til Anders kostar han heilt sikkert eindel om dei stadig tek røykepause, meinte Oddgeir Bjoravik (Frp).

– Om malarane bur i Os er det ingenting i vegen for å laga eit røykesluttkurs for dei, svara Hope Nilsen.

Saknar menn og born

Sjølv om 11 menn deltek på aktivitetane til frisklivssentralen saknar Hope Nilsen fleire menn.

– Eg kunne ha lyst til å laga ei eiga herregruppe, men de menn skal liksom ikkje delta på slike ting.

– Ei anna gruppe som ikkje har teke kontakt er barn og unge eller foreldra deira.

– Frisklivssentralen skal vera eit lågterskeltilbod kor alle kan henvenda seg, avslutta Karen Hope Nilsen.

Tilbodet omfattar både kurs, fysisk aktivitet og individuell eller gruppebasert rettleiing.