- Det ser lovande ut

Etter ei svært god treningsveke, med vellukka matching mot seniorspelarar i går, er juniorane til Os sprengklare for Norway Cup.

Kjetil Vasby Bruarøyfredag 24. juli 2009 11:34

Sundag starta Os junior med treninga igjen etter ferien, og veka har ifølgje hovudtrenar Øyvind Steffensen vore svært god.

- Vi har trent kvar dag, og det har vore kjempestemning hos spelarane. No trur eg dei er meir enn klare for avreise, seier Øyvind.

Treningskamp mot seniorane
Torsdag spelte dei 2 x 30 minutt mot A-laget, eller rettare sagt; seniorane som til no har kome tilbake frå ferie. Førstelaget til juniorane spelte førsteomgang og vann 1-0 etter skåring av Ramo Racic, andrelaget spelte andreomgang, som enda 0-0.

- Dette var ei god treningsøkt for oss, der vi blant anna fekk øvd på ulike typar situasjonar. Både enkeltprestasjonar og lagspelet dei viste får oss til å bli optimistiske, seier Øyvind.

To lag - 30 spelarar
Øyvind Steffensen skal leia førstelaget saman med Asbjørn Bergstø. Bjørn Bakke, som vanlegvis er del av trenarapparatet er på ferie. Andrelaget blir leia av Leif Gunnar Borgen og Bjarte Vevatne.

- Det var ikkje lett å dela spelarar i førstelag og andrelag. Vi har også nokre som har vore skadd, og derfor ikkje har trent eller spelt så mykje i det siste, men som elles ville fått plass på førstelaget.

- Men måndag tok vi ut laga, og eg er sikker på at alle kjem til å yta sitt beste for det laget dei spelar for. Turneringa handlar mykje om resultat, men skal også vera både god spelarutvikling og ein kjekk og sosial ting å vera med på.

Her er spelarane og laga
Os 1: Marcus Dalland, Even Bjoarvik, Baste Jonassen, Dani Bergstø, Kristoffer Sande, Martin Eidsvik, Mats Lepsøe, Vegard Leikvoll Moberg, Preben Borgen, Espen Kopperud, Ramo Racic, Espen Valvik, Sven Lyssand, John Ole Johannessen, Kjartan Svendsen og Erik Kanestrøm.

Os 2: Fredrik Sælen, Henrik Takle Eide, Børge Borgen, Vegard Engelsen Moberg, Stian Dale, Stian Bakke, Espen Lie, Benjamin Holme, Sondre Samdal, Aleksander Havsgård, Stian Helland, Tor Erik Berge, Åsmund Berge og Daniel Vevatne.

Os 1 møter Furuset og Abilsø i puljespelet, Os 2 møter Rælingen, Hødd og eit lag frå Kasakhstan.

Begge laga spelar første kamp sundag.

Til semifinale for fem år sidan
I fjor imponerte juniorane med å ta seg heilt til kvartfinalen i Norway Cup. Der enda det med 0-1-tap for KFUM-Kam 3.

Vi treng ikkje gå lengre tilbake enn til 2004 for å finna juniorar frå Os i semifinale i A-sluttspelet (dei tapte for eit nigeriansk lag), men vi må heilt tilbake til 1978 for å finna beste prestasjon til no - finale og 2. plass (0-4-tap for Molde).