Det som er gratis er ikkje «utselt»: I dag blei familieprogrammet klart.
Fortel om rigging, «risikofaktorar» og nye innslag på familiedagen.
Måndag startar rigginga, torsdag formiddag er første innslag i årets Øyafest-program, den femte festivalen i rekka: Rebus Run i båt for ungar og ungdomar og gratiskonsert for heile familien i Homrahølo på kvelden.
Men først: Lurer du på om Midtsiden har billettar å lodda ut til utselt fredag- og laurdag kveld? Følg med på søndag.
Festivalkontoret i gangen på gymsalen er allereie rigga. Der blei i dag dei siste bookingane til familiedagen fredag gjennomført.
– No kan me gå ut med endeleg program for denne dagen òg, seier Ivar Bøthun.
Han er festivalsjef saman med Tommy Aasen.
– Me var heldige som fekk sikra oss Paw Patrol tidleg, dei er populære og travle, seier Tommy.
Ryder og hundane i PAW Patrol jobber på TV hardt for at det skal vera fred og ro i Adventure Bay. Fredag skal dei sørga for at ting er på geledd før festen startar for alvor på Sundøy Arena.
Nye strilesongar
I tillegg inneheld familiedagen konsert med The Strils, trikseskule med Sondre Ødegård Aksnes og skyt-hardt-i mål-konkurranse i fotball.
– Me har fått tak i veldig fine premiar i år òg. Målet er å få til ein skikkeleg finale.
Sondre skal ha både show og undervising. Han var òg på Øyafest utgåve to, altså i 2023.
The Strils, med Christer Sundøy Røttingen i spissen (og Eirik Søfteland på trommer), skal framføra fleire nye songar. Var du på opning av Prix Øyane før sommaren fekk du høyra to av dei.
– Det har rullert litt på mattilbodet på festivalkveldane, kven kjem i år?
– Det gjekk unna i fjor, det blei tomt for både flammeburgarar og bakt potet. Laurdag åleine gjekk det tusen av kvar, fortel Ivar.
Risiko: Fiske og fotball
Potetbakeriet kjem tilbake. No på matservering under festivalen i år er Peppes Pizza.
– Vêret ser ut til å bli noko lettare inn mot neste helg enn i starten på veka. Er det noko anna som er spennande?
– Sjølv om det alltid har gått veldig raskt og fint, blir det spennande å sjå oppmøtet under rigginga frå måndag.
– Eg og Torbjørn skulle jo vore på Norway Cup og sett ungane våre i kamp. Det blir spennande å sjå kor tid dei kjem heim, om dei rekk å hjelpa til.
– Om dei lokale laga kjem langt, får vi heller visa dei på storskjerm.
Mannskapen på Hargun, som er ute for å fiska siste 1500 tonn av kvoten, er òg spente på om dei rekk å få fisk, levera fangsten og koma seg heim.
– Om Lilly Maud brått skal fiska lodde, kan det òg bli spennande, seier maskinist Ivar.
Festivalen - dag for dag
Torsdag, dagtid: Rebus Run. Start og mål på Coop Prix Øyane
Torsdag kveld i Homrahølo (gratis): Frida Amundsen og Trygve Skaug
Fredag, gratis familiefest på dagtid: PAW Patrol, konsert med The Strils, trikseshow og trikseskule med Sondre Ødegård Aksnes og fleire konkurransar.
Fredag i telt på Sundøy Arena (utselt på eitt minutt): Cir.Cuz og The Strils (med Christer Sundøy Røttingen i front)
Laurdag i teltet (utselt): Seagulls og den faste «fyrbøtaren» Goggen.
Laurdag på hovudscenen (utselt): Jonas Lovv, Rotlaus og Kjartan Lauritzen.